會展嬰兒展@人生的第一場比賽

11 JUNE 2011 (SAT)

去會展嘅展覽會我都係去過兩次，嗰兩次就係去JOIN影婚紗相。係大肚嘅時候都有諗過去，不過見啲媽媽講冇乜嘢買，所以就打消左個念頭。不過今日終於都可以去入去八卦一吓啦！

今次入去主要目的就係帶小小豬去參加爬行大賽呀！

其實小小豬都係近依個星期先叫做可以正正經經咁去爬，所以開頭知道有得報名都心大心細。不過最後都決定報名，我都打算俾小小豬見識一吓。

終於都等到今日去比賽啦！雖然話志在參與，不過話晒小小豬都係第一次去比賽，所以都真係有啲緊張。

我地今日人強馬強，除左我同大肥豬之外，仲有小豬媽、LULU妹、小肥肥同埋糖糖一齊去。

等到夠鐘，我地開始入去比賽。負責引小小豬工作我地就交左俾小豬媽。

係開始時小小豬都好似唔多願意~

我地嘅秘密武器出場啦~

一見到包檸檬茶就開始發狂啦~

開始比賽~

真係完全冇諗過，小小豬贏左依場比賽，可以小組第一名進入決賽。嘩...依個時候我地都真係開心到傻左，仲興奮過小小豬呀！

當我地入到後台時，因為我地唔知幾時開始進入決賽，再上小小豬又開始扭計，所以我地就開奶奶俾小小豬飲。

點知當飲左一半奶奶之後，竟然就要開始決賽，所以我地唯有停止飲奶奶去比賽。

以小小豬當時嘅狀態，我地都估佢唔會贏到，不過既然參加得，當然要去爬爬~

決賽嘅BB真係好利害，用左四秒幾就爬完。雖然明知道已經有人勝出左，不過小小豬都繼續爬埋佢，因為做人要有體育精神嘛！

嬴唔到大獎，都有份小紀念品，都幾好呀...哈哈哈~

其實小小豬可以由小組第一名進入決賽，我都已經覺得好難得。我真係完全冇諗過，係去參加比賽時我仲話如果小小豬可以爬完全程我已經好開心呀！

阿Q啲咁諗，小小豬人生第一場比賽(就即係初賽)已經可以拎第一名，已經好叻仔啦！

我地錄左小小豬第一次爬爬嘅短片，因為實在太緊張，所以有少少搖晃，所以大家唔好介意呀~