4 JUNE 2011 (SAT)
一早就計劃好帶小小豬去游龍舟水,所以就買左好多嘢準備,有泳衣、沙灘用具、水泡同埋沙灘蓆。
原本都以為買齊晒所有用品,點知有一位朋友仔問我買左游水片片。唔係佢講,我都真係唔知要買哦。之後我又睇左啲討論區,好多媽咪都建議俾BB著游水片片,可以保護一吓嘛,所以我就打算買啦!
不過都唔係易買到,我地分別去過萬寧、屈臣、吉吉島同埋APITA,都唔見有得買。所以都諗住唔買,到時小心啲睇住小小豬就算。
點知今日心血來潮入百佳廣場睇睇,竟然一眼就俾我見到,即刻買啦~
早知屋企樓下間百佳有就唔洗四周圍搵,不過有時就係咁,當你想搵時係會搵唔到,但當你放棄時就會好簡單咁出現係你眼前...哈哈!
依家真係萬事皆備,只欠明天嘅天氣(希望好天氣啦),咁就可以帶小小豬去沙灘玩個痛快啦!
沒有留言:
發佈留言