屋企繼續玩

5 JUNE 2011 (SUN)

同兩位姊姊短聚之後，當然係唔夠喉，所以我地就返屋企繼續玩過。

不過兩位姊姊就先去SHOPPING買少少嘢，咁我地就趁依段即刻返屋企幫小小豬洗白白同飲奶奶。唔知係唔係太過攰，小小豬洗完白白，係飲奶奶中途都已經瞓左覺，所以我就有啲時間可以去買嘢準備我地個邊爐宴。哈哈...兩位姊姊陪小小豬玩左成日，都係應該慰勞吓佢地呀！

可能小小豬真係實在太攰，所以瞓左好耐，等我好舒服咁食左個晚飯。不過因為小小豬都係時候要起身食粥粥，所以唯有叫醒佢啦！(其實一般嚟講我地係唔會主動叫醒佢，不過因為今日出左街，所以全日食少左一餐粥，所以迫住要叫醒佢)

瞓醒左嘅小小豬真係唔同啲，同兩位姊姊玩得幾開心~

今日有兩位姊姊陪小小豬玩左成日當然係好開心，不過下次都係要搵啲室內地方先得，因為成日街上面又真係好熱呀...哈哈！