叮噹三輪車

10 JUNE 2011 (FRI)

踏入十個月嘅小小豬，又有一件新玩具。繼早前有部豬仔車之後，今日就多部勁可愛嘅叮噹三輪車呀！

大家都知道小小豬係有兩頭住家，原本我打算拎部豬仔車返自己屋企，等我地假期時可以帶佢落公園玩。不過大肥豬就唔讚成，話小小豬係小豬媽屋企時間長啲，咁等佢可以多啲玩具玩。

依個時候小豬媽就話不如買多一部，等佢兩邊都有得玩，加上當時我細路又係度話會贊助吓，就係咁就開始物色多一部車仔。

既然買多一部，當然唔好又買豬仔車，所以我地就決定買部三輪車，諗住可以玩多幾年嘛！

原本都冇打算係淘寶買，不過見有BK媽媽介紹左依部車，見又唔貴都係二百蚊左右，所以就買左佢啦！

等左幾日，今日終於都收到貨。一打開嚟睇，嘩...原來係要自己砌，又覺得好大部，所以都勁擔心買錯嘢。

最後經過小豬爸同大肥豬嘅合力，佢地都砌左成晚，終於都完成啦~

砌好左之後，即刻俾小小豬試玩吓先，開頭佢都好似有少少驚咁~

不過坐多左一陣就識應左，仲玩得好開心添~

好在砌好左都唔太大部，小小豬都玩到。依部車將會拎返去我地屋企，等假期嘅時間可以帶小小豬落公園時玩呀！