忙碌的第二天假期

22 JULY 2009 (WED)

今日一早，就俾大肥豬捉左去洗牙(冇錯....係要用個捉字，因為我真係好怕去睇牙醫呀~)，因為佢公司有員工福利，連同配偶都有著數，所以就算我真係好驚，都要去睇洗牙呀！

真係冇驚錯，一訓上張牙醫床，我就已經周身唔舒服。當牙醫開始嘅時候，嗰啲『吱..吱...』聲，真係聽到我好唔舒服，成個人都震晒咁。

好在....醫生都話我嘅牙齒算OK，所以都唔洗用太多時間。不過，好不幸地俾醫生發現左我有蛀牙。所以...又要搵日再驚過添。

洗完牙之後，買左飛睇睇哈利波特又未夠鐘，就係依個時候，醒起小M之前介紹過和昌大押個平台花園，見又近近地，所以就去行左一轉，影左少少相啦~

可能真係冇乜人關係，成個場都只係得我地兩個加一位管理員姐姐，所以我地又係度大影特影，仲叫左位姐姐幫我地影左張靚靚合照添~

雖然我個樣都唔係太好樣，不過依張相個感覺又真係唔錯，可以話係是日至愛呀~

之後我地見時間差唔多，就再向時代廣場出發，入場睇戲啦~

我都係第一次入戲院睇哈利波特，之前都係睇無線播嗰啲。

講真...今次依輯真係麻麻地，個場節好慢，完全冇緊張鏡頭，就算ENDING都唔明個劇情講乜，可能係留待下集大結局先有好畫面啦！