海洋公園一天遊

今日我地一家同契大佬一家一行12人去左海洋公園玩左一日，雖然天氣唔算太好，仲間唔中都有落毛毛雨。可能因為依個原因，所以都唔係太多人，玩機動遊戲都唔係太要排隊。總括都好好玩，好開心呀~~

不過...都有少少遺憾，就係因為熊貓館裝修緊要去迎接新的熊貓，所以冇得去探『安安』同『佳佳』。不過...我地都有同公仔熊貓影相補數。(睇睇吓...似唔似三隻大熊貓係度影相呢！)

另外，佢個新遊戲 - 升空氣球，又因為天氣影響，所以冇得玩....真係超失望呀！今次入去都係打算玩依個新遊戲，點知冇得玩.....唯有影張相就算啦~

雖然冇得入去真嗰個升空球，佢地都有個放個景係度，俾人影相。我當然唔執輸去排隊影番張啦！冇得玩真，假都照殺啦！

我終於去到水母館啦~~~上次我海洋公園都冇入過去呀....因為人太多啦！今次我地都要排隊，不過都係20分鐘左右就入到去啦。D水母真係好靚，經D燈打落去，出嚟效果仲靚。但因為入面太黑啦~~所以影唔到相呀！(可能係我唔識影啦)所以就係出面同D水母公仔影相，當留為記念啦！

之後我地就去海洋館、鯊魚館...等等睇海洋動物啦！因為爸爸係好鐘意睇....

睇完之後，就到我地玩啦~~

我地都玩左好多機動遊戲....又木馬、又千秋，跟著就玩D激D嘅海盜船、飛船同過山車(較新嗰款)，真係好好玩，雖然有少少驚...但都好鐘意玩嫁，唔知依D係唔係叫做『又要玩，又要驚』呢？

成個行程最舒服都係契大佬個仔啦！要食野...就有野食，又可以坐佢部私家車，仲有得午睡...小朋友真係幸福啦！佢好攪笑嫁，因為佢好鐘意火車頭，佢見到我地玩嗰過山車係火車狀，佢又話要玩，當然唔能啦，所以佢就一邊食薯條，一邊睇住我地玩啦。(睇佢個樣幾想玩！)

不過...經過今日，我真係發覺原來帶埋小朋友去玩，唔係太方便。唔係話佢地麻煩，只係做父母要成日擔心佢地凍唔凍，要唔要去洗手間...鐘唔鐘意玩嗰個GAME，自己又要照顧個小朋友冇得玩，所以話做父母都真實好難呀！