【益氣補血】石斛黨參南棗瘦肉湯

 15 DECEMBER 2020(TUE)

天氣開始凍凍地，所以都係時候要煲返啲益氣又補血嘅湯俾小小豬飲，等佢可以身體暖返啲，咁就冇咁易病嘛！

當我去藥材店買藥材時，店主姐姐就向我介紹左一個湯包，之後仲可以加埋石斛落好一齊煲，咁就既益氣補血之餘，仲有助明目護眼。

嘩...聽到依三個嘅好處就緊係唔洗諗，即刻買嚟煲俾兩位老細飲啦~

石斛一両、南棗一両、黨參半両、百合一両、南北杏約一湯匙、白芍半両、麥冬一両、淮山一両、伏神一両、蜜棗三粒及瘦肉約$40~

將所有藥材浸洗一陣~

瘦肉洗淨汆水~

煲內放約3L水，待水滾後加入所有材料~

待滾起後，繼續用大火加蓋煲約15分鐘~

之後轉慢火加蓋煲多1.5小時~ 

最後加鹽調味，就可以飲得啦~

今次依個湯主要都係以藥材為主，所以開頭都有丁點擔心會有少少苦苦味。但原來入口都唔錯，都唔覺係飲緊藥材湯，小小豬仲話知道對眼睛好，所以一口氣飲左兩大碗添！

以下係各食材嘅功效，可以參考一下呀(網上資料)： 

石斛 - 益胃生津，滋陰清熱，能補五藏虛勞，亦有明目護眼功效。
南棗 - 補而不燥，補血益腸胃及有滋養寧神作用。
黨參 - 有補中益氣、固本健脾的功效。
百合 - 能夠解毒、安神、治療咳嗽失眠，對女性來說還能夠很好的抗衰老。
南北杏 - 可止咳下氣，潤燥消積。
白芍 - 養血調經及斂陰止汗。
麥冬 - 有助養陰生津，潤肺清心。
淮山 - 健脾開胃，其他好處為治療久泄久痢、肺氣虛燥、及消渴尿頻等症。
伏神 - 有寧心安神、利水的功效。
蜜棗 - 止咳潤肺、化痰平喘功效。 

溫馨提示： 
- 由於個別人仕體質不同，所以大家記得煲之前了解下自己，如有疑問，請先向註冊中醫查詢！