【健脾護眼養胃】瑤柱南瓜粟米湯

2 DECEMBER 2020(WED)

繼續ZOOM ZOOM的日子，所以我都好勤力咁上網睇下有咩護眼嘅食材可以等小小豬加強保護下。

南瓜、粟米同埋紅蘿蔔一向都係好有營養豐富，既可以增強免疫力，仲可以養胃健脾，但原來佢地都係對眼睛好好，咁就啱晒依家小小豬，所以就快快手買齊材料，煲依個超甜嘅瑤柱南瓜粟米湯啦~

南瓜半個、瑤柱六粒、粟米一條、紅蘿蔔一條、蕃茄三粒、淮山一両、茨實一両、南北杏一湯匙、蜜棗兩粒、杞子半両~

乾瑤柱洗乾淨浸半小時，然後摵為絲~ 

南瓜去瓤，然後切厚件~ 

蕃茄洗淨切件~ 

紅蘿蔔去皮切塊；粟米切件~

其他材料浸洗一陣~

煲內放約3L水，待水滾後加入所有材料~ 

待滾起後，繼續用大火加蓋煲約15分鐘~

之後轉慢火加蓋煲多1.5小時~

最後加少少鹽調味，就可以飲得啦~

成個南瓜已經俾我煲融晒係湯入面，再加埋蕃茄同埋嘅瑤柱嘅香，個味真係好正，話晒咁快我地三口子就KO晒成煲湯，小小豬仲叫我過兩日再煲俾佢飲添！

以下係各食材嘅功效，可以參考一下呀(網上資料)：
南瓜 - 有助增強免疫力、保護心血管及護眼，同時亦可以預防癌症及胃潰瘍。
瑤柱 - 有助降血壓、降膽固醇及補益健身。而且還具有抗癌、軟化血血管及預防動脈硬化等功效。 

粟米 - 有增強體力、還能有效對抗眼睛老化及促進腦補發育。同時亦可去除體內濕熱之氣，仲可以利水、消腫。
紅蘿蔔 - 有促助減少眼睛疲勞與眼睛乾燥，同時亦有助清熱解毒、利濕、散瘀、健胃消食、化痰止咳、順氣、利便、生津止渴、補中安五臟等功能。
蕃茄 - 有提高人體免疫力、保護心腦血管、養陰生津、健脾養胃及降低疾病發生。
淮山 - 有健脾、補肺、固腎、益精等多種好處。
茨實 - 有補脾袪濕、益腎固精、滋養強身等作用。
南北杏 - 潤肺、止咳及平喘，亦可生津開胃。
杞子 - 有助養腎潤肺，也可補肝明目。
蜜棗- 止咳潤肺、化痰平喘功效。 

溫馨提示：
- 由於個別人仕體質不同，所以大家記得煲之前了解下自己，如有疑問，請先向註冊中醫查詢！