【清肝明目】羅漢果黃豆夏桑菊茶

7 October 2017(SAT)

雖然我都成日煲唔同款啱節氣嘅涼茶，不過依隻豬仔唔知係咪俾我寵慣左，如果有一日屋企冇涼茶飲佢就會投訴，有時都真係唔知好嬲定好笑。

為左唔好令小小豬失望，所以我屋企都一定會有好幾包大路涼茶，當我唔知煲咩時都可以頂一頂。 夏桑菊都係我常煲嘅一款，正當我去藥材店執定幾份材料看門口時，店主叔叔就教我煲左依個羅漢果黃豆夏桑菊茶，比起普通嘅夏桑菊效用多啲啲之外，最好就係加埋紅蘿蔔同黃豆一齊煲就可以令涼茶更加甜，所以小朋友都應該會好鐘意。

哈哈哈...有人教煲新嘢就當然即刻跟住嚟煲下啦~

 

夏枯草、桑葉同菊花就清肝明目同埋潤肺止咳；黃豆就可以增強機體免疫功能；羅漢果益肝健脾、清肺潤腸；紅蘿蔔可健脾寬中及治咳嗽。所以幾種加埋就有清肝明目、疏風散熱、潤肺防感同埋化痰止咳之功效。(網上資料) 

夏枯草1両、黃豆100g、羅漢果1個、菊花半両、桑葉半両、紅蘿蔔2條~

 

羅漢果洗淨搣碎；黃豆預先浸洗最少1小時~

 

夏枯草及桑葉浸洗一陣~

 

紅蘿蔔去皮切塊~ 

 

煲內放入3L，然後加入所有材料(菊花除外)~   

 

然後用大火加蓋煲約10分鐘~

 

之後用慢火加蓋煲30分鐘~

 

最後再加入菊花，再以慢火加蓋煲15分鐘~ 

 

隔楂後就可以飲啦~ 

 
估佢唔到個味道又真係幾甜，就連平日唔多鐘意飲羅漢果涼茶嘅小小豬都肯乖乖飲左一大杯。我諗就紅蘿蔔同黃豆蓋過羅漢果嗰一個味，小小豬仲叫我再煲依款涼茶添...哈哈哈！



溫馨提示：
由於羅漢果屬性都偏涼，所以係好因應個人體質，大家記得煲之前了解下自己，或者問下相熟中醫/藥材店職員，呢個啱唔啱自己飲呀！