【生津清熱】竹蔗茅根馬蹄水

15 October 2017(SUN)

竹蔗茅根馬蹄水我都真係煲過好多次，絕對係兩父子嘅至愛頭幾位，我記得幾年前我都曾經出過分文章分享。

點解今次又再出？因為買材料時姨姨教左我一個新方法，煲出嚟會甜啲又可以出味啲，所以就等我又寫下文(順便拍下片呃下文啦...哈哈哈)~

馬蹄竹蔗茅根水除左好飲之外，仲好有益處，而且好啱大人同小朋友飲。因為竹蔗、茅根、馬蹄同樣有清熱下火，生津止渴，涼血解毒，舒緩肺燥。雖然依啲食材都係帶有少少涼性，但當平日食得多煎炸熱氣食物時嘅要清清熱。 

竹蔗2條、茅根2小紮、馬蹄10粒、紅蘿蔔2條、冰糖適量(份量就隨自己口味)~

 

今次最特別之處就係啲竹蔗係切到一片片，其實我買嘅時候都冇諗過係咁，只係以為姨姨幫我破開幾小段，等我返屋企再處理。不過當我俾完錢之後，姨姨就幫我拎左入機切片，佢仲話咁樣係可以煲嘅時候更加出味~

 

竹蔗及茅根洗淨~ 

 

馬碲姨姨又教左我一個新方式洗，就係切去頭同尾，然後拍鬆佢。姨姨話馬碲跟皮煲係會甜好多呀~

 

紅蘿蔔去皮洗淨切塊~  

 

煲內放約4L水，然後隨水加入材料(冰糖除外)~

 

用大火加蓋煲約30分鐘~

 

然後轉慢火加蓋煲多45分鐘~ 

然後就可以加入冰糖，再繼續慢火加蓋煲多30分鐘~

好飲又有益嘅竹蔗茅根馬蹄水飲得啦~

 

姨姨真係冇介紹錯，用左依兩個新方式煲真係甜好多，蔗味又出啲，所以兩位老細都飲不停，仲不停要添飲呀~

 

煲到好好味嘅涼茶都真係好有滿足感，不過....我今次煲完就有少少壓力，因為今次嘅竹蔗我係前日行完屏山文物徑之後，路經天水圍街市食午餐之後，八八卦卦周圍行買嘅。唔知屋企附近嘅姨姨有冇依個服務呢，睇嚟我都要搵下屋企附近有冇食材店可以幫忙切片，咁先可以滿足我兩位老細啦！

溫馨提示：
– 由於個別人仕體質不同，所以大家記得煲之前了解下自己，如有疑問，請先向註冊中醫查詢！