【滋潤乾燥必飲】雪梨無花果水

30 October 2017(MON)

我成日都話小小豬係一個容易乾燥的男仔，係依日早晚開始有啲秋風，就係咁佢個爆擦咀又嚟(慶幸身體上都未見濕疹壞朋友嚟探佢)。一見到佢咀仔又乾又甩皮，所以就快快手煲個滋潤乾燥必飲嘅無花果雪梨水，等佢可以快快手滋潤返先得~

雪梨就可以清熱降火，潤肺去燥；無花果健脾、滋潤；陳皮就可以健脾化痰，而且雪梨本身都帶有少少涼性雪梨，所以加少少陳皮就可以起到一個中和作用，所以煲出嚟出嚟就唔會太寒涼，大人同小朋友都可以飲得(當然.....各人體質都有唔同，所以最好就係煲之前了解下自己)！

雪梨3個、無花果6粒、南北杏 2湯匙、陳皮1小片~

 

雪梨洗淨後去芯切粒塊；陳皮浸透去囊~ 

 

無花果洗淨切半，然後同南北杏一齊浸洗~

 

將所有材料(雪梨梨除外)及1.5L水加入煲內~ 

 

待水滾後，就可以加入雪梨~

 

然後用大火加蓋煲約10分鐘~ 

 

最後繼續用慢火加蓋煲多20分鐘~

 

話咁快就飲得啦~

其實雪梨同無花果分別配過唔同材料俾小小豬飲，所以我完全唔會擔心個味道。不過依一個配搭又真係幾好飲，入口甜甜地又有好香雪梨味，所以好快就清晒啦！



溫馨提示：
始終雪梨性質都較寒涼，由於個別人仕體質不同，所以大家記得煲之前了解下自己，如有疑問，請先向註冊中醫查詢！