【暢玩單車樂】屯門交通安全城

14 October 2017(SAT)

今晚約左公公..舅父去屯門食晚飯，見有時間就帶小小豬想去好耐嘅屯門交通安全城玩下啦~

其實我地三口子間唔中都會去秀茂坪交通安全城玩，小小豬都不知幾鐘意，所以佢就自己係學校上網搵資料，知道北角、屯門及沙田都有交通安全城，之後佢就提意我地去晒依幾個點去玩。

其實我一早就知有依幾個地方，只不過未決定去嘅時候就唔同小小豬講，因為.....一答應左依隻心急豬，佢就會不停出音波功要即刻去，我就有排煩了....哈哈哈！

一嚟到就已經見到好多大小朋友係度玩，緊係啦...依家天氣涼涼地，最啱就係去戶外活動，踏單車就真係啱晒呀~ 

 

小小豬一落到場就已經急不及待去踏啦~

 

同秀茂坪交通安全城一樣，整個交通安全城都真係好似一個小馬路，大大小小嘅路牌、斑馬線、馬路的行車線及迴璇處都好齊存。同樣啲交通燈都係因為假日要休息，所以冇開。唔緊要....假日嚟玩就唯有我地家長聲控啦...哈哈哈~

  依度仲有巴士站同埋泊車處，又真係幾迫真哦~

由於屯門有輕鐵，所以依度嘅交通安全城都加插同輕鐵設施同海報添~

 

有得玩小小豬就最開心，成日都捉我同DADDY扮行人，一時叫我地扮行人等過馬路，一時又扮等巴士過紅綠燈，真係俾佢點到頭都暈。不過見佢玩得咁開心，陪佢玩一陣，俾佢點下都不為過呀~

 

估唔到依一個小小地方我地都玩左差唔多一個半鐘，如果唔係因為夠鐘去食飯，我諗小小豬踏多幾轉都未肯走。

依個傻豬仔已經計劃左嚟緊放假要去埋北角同沙田嘅交通安全城，難得佢鐘意我當然非常落意奉陪啦！

溫馨提示：
-  需要自備單車，其實正確嘅只可以帶備三輪車，但問過在場當值姨姨，佢話單車都可以(必定要小心行車，唔可以踏太快)。
 - 依個場地係唔可以泊車的，所以各位家長如果渣車前往，係需要泊係附近商場嘅停車場呀！