【滋陰潤肺】蟲草花雪耳螺頭瘦肉湯

13 October 2017(FRI)

終於感受到秋天嘅涼意，一踏入秋天就總係諗起雪耳，依家初秋天氣都帶點乾燥，而且早晚溫差都好易令人生病，所以都要煲多啲滋陰潤肺同埋提高身體免疫力湯水，所以就煲蟲草花雪耳螺頭瘦肉湯啦~

 

雪耳係滋潤相信大家都知，螺頭就有滋陰補精、清熱去濕功用，蟲草花有滋陰潤肺功效，又可潤澤肌膚。所以依幾樣材料就好啱秋天。

蟲草花1兩、淮山1兩、百合1兩、雪耳1兩、南北杏半兩、杞子3錢、乾螺頭6粒同埋瘦肉$35~

雪耳浸軟後去蒂~

瘦肉及乾螺頭洗淨汆水~ 

其他藥材浸洗一陣~ 

煲內放約3L水，然後隨水加入所有材料~

待再次滾起時，用大火加蓋煲約30分鐘~

 
再轉慢火加蓋煲1.5小時~ 

最後加入少少鹽調味，就可以飲啦~ 

螺頭、蟲草花再加埋雪耳，啖湯真係甜到冇朋友，當然小小豬就係我頭號粉絲，佢話好鍾意依個湯，叫我下次再煲過添！

難得佢賞面，我當然非常樂意再煲，趁依家開始轉天氣時打好個底，好好迎接秋冬嘅乾燥嘛！


溫馨提示：
– 由於材料都涉及藥材成分，所以係好因應個人體質，大家記得煲之前了解下自己，或者問下相熟中醫/藥材店職員，呢個湯料啱唔啱自己呀！
– 雖然雪耳係好味又有益，不過都要再提多大家煲過嘅雪耳一定要即日食/飲晒，如果隔夜，經過一夜嘅浸透，佢就會放出一啲有害物，到時就有益變有害啦！