咖啡糕

6 MARCH 2015(FRI)

依排係FACEBOOK見好多朋友仔都整左咖啡糕，所以我又湊熱鬧試下啦~

哈哈哈...其實今次整甜品都係血來潮，好在屋企有齊所有材料，所以先可以即刻有得整呀~

先用1匙凍水開左包即溶咖啡~

然後分別加一包鮮奶及一罐淡奶~

依個時候可以先試一試味，如果覺得味道唔夠，就可以因應個人口味加即溶咖啡或糖(因為我唔想食太甜，所以我係冇加糖)。試左個味可以的話，就可以開始準備魚膠粉。

將三分一盒嘅魚膠粉放入兩匙凍水開溶~

然後慢慢再加入咖啡液中，慢慢拌勻~

最後倒入容器內，就可以放入雪櫃雪到凝固~

等大約兩個鐘之後就得啦(由於我用玻璃容器，所以雪嘅時就耐啲啲)~

之後切開粒粒，我切得比較細粒，因為可以一口粒嘛~

食得啦~

依個甜品就可以話你因應個人口味而決定係唔係成功，因為幾位咖啡愛好者就覺得個咖啡味唔算太濃。不過我同嘉汶表妹都覺得有咖啡味，所以原來咖啡類甜品都唔係易整，各人對咖啡敏感度都唔同嘛！

其實用依個方法可以將咖啡粉改為其作味道，我已經打算下次用綠荼粉或者可可粉嚟整，應該啱大家多啲呀！