士多啤梨布甸

9 MARCH 2015(MON)

今日小小豬又變身成為小廚師，自己整甜品食就係最開心嘅事呀~

其實我都係因為尋日行街市時見到啲又平又紅卜卜嘅士多啤梨，兩盒都只係賣$15，咁抵又點忍到手呢~

屋企又有士多啤梨味啫喱粉同花奶，所以就可以整士多啤梨布甸啦！

首先就要將士多啤梨洗淨及切粒，依個步驟小小豬都可以做到，所以就交俾佢做啦！小小豬做嘅時候都非常認真，慢慢咁切切切呀~

依一碗士多啤梨粒粒全部都係小小豬切，雖然都切左差唔多二十分鐘，不過全程小小豬好專心咁切，仲要冇切到手仔，都算佢叻仔~

將啫喱粉倒入碗內，倒入280ml熱水攪至溶解~

倒入花奶再拌勻~

最後加入士多啤梨粒~

然後倒入容器~

依個就係我地今晚嘅飯後甜品啦(般放入雪櫃雪約1小時就食得啦)~

甩模後嘅小動物都幾靚呀~

哈哈哈...小小豬鐘意食就一定呀，不過估唔到平日唔多鐘意食甜品嘅大肥豬都話....堅好食呀！(哈哈哈...當然其中一個原因係依個布甸係小小豬整嘛)~

其實我鐘意同小小豬一齊親子廚房，當然係因為小小豬鐘意食有關啦！不過其實亦都係希望透過煮嘅過程，希望可以對小小豬做訓練，好似可以訓練一下佢嘅聆聽指示、手眼協調同埋專注力，同埋完成甜品時嗰一份滿足感同自信心，所以嚟緊要多啲同小小豬親子廚房，等佢訓練多啲，做好啲先得！