小小豬55個月@ALFAFA

10 MARCH 2015(TUE)

又嚟到每月十號嘅時候，即係小小豬又大一個月，依家小小豬已經55個月大啦(自覺小小豬依個為食樣好似我細個呀…哈哈哈)~

 

其實小小豬細細個時，每一個月嘅十號我都會有啲小攪作慶祝一下。隨住小小豬都已經四歲半有多，所以近依幾個月都冇乜作特別紀念。

原本今日都冇計劃特別活動，不過今日放學時小小豬突然話想接大肥豬放工，見佢返學都算乖乖，加上我又諗唔到煮咩晚餐好，所以就去接放工之後去食晚餐啦！

今次大肥豬帶左我地去樂富嘅ALFAFA食豐富晚餐呀~

依間餐廳我地都係第一次嚟，整體上個環境都好舒服。場內嘅姐姐仲非常細心，一見到小小豬就為佢準備高椅同埋可塗色嘅兒童餐單俾小小豬啦~

我地叫左一SET二人套餐，雖然份量就好似少左啲啲，不過碟碟味道都唔錯，有啲驚喜呀！

先嚟餐湯同包包，個湯好香濃嘅磨菇味，啱我口味呀~

包包控嘅小小豬一定唔放過塊麵包啦~

好FRESH嘅田園沙律~

芝士焗西蘭花，不過我覺得如果可以多少少芝士會更加好味~

我地嘅主菜分別係豬扒意粉同海鮮燴飯(其實佢地嘅全名係好好聽，不過我唔記得左...HEE HEE)，味道方面都真係唔錯，尤其係塊豬扒，好入味又鬆軟，基本上成塊都俾小小豬KO左啦~

成枱都係食物，小小豬食得幾滿足~

食飽飽就有餐飲~

仲有小小豬至愛嘅甜品...係雪糕呀~

為食豬又嚟密密食啦~

今次依一餐整體上都唔錯，啲嘢食都幾好食，環境又座得幾舒服，加上個價錢都唔算貴，所以大肥豬都話有機會要再嚟食過呀！

小小豬聽到不知幾開心，仲好興奮咁話：好嘢....又可以嚟食雪糕啦！(小朋友一知道有雪糕食就失控了)