人都癲

3 NOVEMBER 2012(SAT)

依幾日真係好忙...好忙...好忙，因為小小豬又病左，仲要係咁多次病嚟請最嚴重嘅一次呀！

話說三十一號下午，今日下午小小豬好精力旺盛，係小豬爸張床度跳...跳...跳。不過當黃昏時，小小豬突然好眼瞓，所以就槑左佢瞓。開頭都冇為意，只係以為佢玩到癲左，所以攰要瞓。點知，到八點幾時，冇端端喊醒左，一抱上手時成身好似發滾咁，探熱先知原來有成39.8度。

見佢燒得咁勁，當要即刻食退燒水。點知食完之後都仲係燒吓唔燒吓咁，直至到十一點半，小小豬仲係燒緊，所以小豬爸係差唔多十二點就同我地去急症室，睇見小小豬咁辛苦個樣，真係好心痛C人啦~

醫生話小小豬係感冒，開左啲強勁退燒水俾我地。

以為睇完急症室，食左藥會好好多。點知到左一號早上，小小豬啲燒都仲未退，加上又開始不停痾，一個鐘內都唔知痾左幾多次，攬到個PATPAT仲又紅又腫，真係擔心C人，最後決定又再去過急症室睇醫生，醫生話小小豬係因為病毒感染腸胃炎。

十二小時內去醫院急症室兩次睇醫生，真係人都癲呀！睇見小小豬個辛苦病樣，真係好肉痛呀！

唉....依個月都已經病左好多次啦！真係唔好再病啦.....希望好快可以好返晒，俾返個精靈小小豬我呀！





**我的微博..關注吧**