10 NOVEMBER 2012(SAT)
又到每月十號，即小小豬又大一個月，唔經唔覺小小豬都已經27個月啦！
今日慶祝27個月嘅活動，就係去兩間幼稚園面試。去面試就當然要著靚仔啲啦，依個裝扮醒目嗎~
今日依兩都係香港龍校，上午嗰間就係西環，下午嗰間就係灣仔半山區。其實兩間嘅面試同之前都係差唔多，都係老師同小小豬傾計，睇吓佢玩玩具嘅情況，睇吓佢可唔可以依老師指令。整體上同預計一樣，小小豬都係怕怕羞羞咁完成老師指令，又唔多肯講嘢。不過佢完全冇扭計，又可以乖乖咁坐定定嚟完成個面試，我都覺得佢好叻仔啦！
我地入到課室，一樣係坐定定玩住玩具等老師嚟同我地傾計，等左兩轉，終於都小小豬啦！老師第一時間就問小小豬叫乜名，小小豬係識答嘅，不過就勁細聲，老師當然聽唔到啦！
老師問即刻問小小豬係唔係唔識講嘢？平日點同我地溝通？我就話小小豬可能係怕羞，平日多數講英文係會多少少.........。我都仲未講完我想講嘅嘢，老師就即刻話：得啦...咁叫個英文老師嚟佢IN啦！(佢就即刻走左去另一位小朋友度IN)
最後，我地等左好耐英文老師先嚟(當時英文老師都係課室入面嘅，不過唔知點解咁遲先嚟)，由於係最後傾計，加上又€要趕住小組一齊跳舞，所以就只係勁簡單咁問左啲問題就完成。
那老師知道小小豬係講嘢唔叻時，我都FEEL到佢已經採取半放棄態度，但又真係冇諗過佢會係咁快就叫其他人接手。
不過依件事唔係我唔開心，我地離開課室時，老師負責送禮物俾小小豬，當收禮物時我就引導仔仔say thank you，點知那老師只係講左句：唉...你唔識講嘢點頭就算啦!!!
聽完之後真係唔開心，係面試過程對小小豬採取放棄態度，我唔可以怪你，只可以當依個係你地老師面試嘅技巧，當然係會集中火力去IN有機會入學嘅學生啦！不過作為一個老師係唔係唔應該咁講嘢呢？咩叫做唔識講嘢點頭就算呢？？？係唔係小小豬唔叻講嘢就要俾歧視！！！！ 老師唔係要有愛心嘛？？？？如果小小豬識聽，咁咪會好傷自專心？？？？
其實係未發生今日事件前，我都真係極度恨入到依間，不過依家真係唔多想，名氣大嘅學校老師就可以咁，唔洗理人感受呢？老師唔係應該鼓勵小朋友，點解可以打激小朋友呢？如果小小豬日後俾佢教，咁咪日日俾佢歧視，又點會開心呢？我只想小小豬開開心心咁渡過佢嘅學校生活！！
我發洩完心情已經好返晒，我亦都唔會俾啲咁嘅人影響到，因為只要我知道小小豬係叻叻就已經足夠！
**我的微博..關注吧**
沒有留言:
發佈留言