第一張證書

2 NOVEMBER 2011(WED)

完成左十堂嘅CPDA PLAYGROUP之後，一直都話會有返張證書同評估報告俾我地，係最後一堂老師話要做完評估後，先可以出到個報告，叫我地等一個星期左右，到時會打電話叫我地上去拎 (其實都真係唔明白，之前見啲同學仔可以係最後一堂收到個評估報告，仲可以同老師傾吓小朋友嘅問題。)

終於等到今日都仍未收到電話，就打去問一問(原來一早就準備好，只係冇人通知我地去拎，真係激C！)，最後就叫左大肥豬放工幫我地拎返嚟啦~
 
小小豬第一張證書~

 
評估報告~
 

除左兩個項目係『表現良好』之外，其他嘅都係『表現非常突出』，睇到真係勁開心，小小豬真係好叻仔呀！

經過依十堂，你問我小小豬學唔學到嘢，我覺得都叫做OK，起碼大部分老師嘅指示佢都跟到，同埋佢又好鐘意嘗試新嘢，玩麵團..油彩嗰啲都唔怕，仲好鐘意玩添。所以我都認為俾佢返PLAYGROUP係有幫助。

不過，當初俾佢返PLAYGROUP嘅原意除左學嘢外，都好希望佢可以同其他小朋友多啲互動。不過到左最後一堂都做唔到依樣，好多時玩玩具時都係自己一個人玩，又好似唔多活躍行去同學仔群入面。不過老師話依樣係正常，佢地要到左兩歲左右先識得群體活動。希望就如老師咁講，唔係小小豬問題。不過我地平日帶佢出街時，都會好主動咁同其他人(一般都係成年人)SAY HI，所以我諗都應該唔會有問題。

我覺得CPDA都幾好，地方雖然唔係大，不過整體上都好乾淨舒服。每一位老師又好好，尤其係教左一半因私人事已離開嘅SONIA姐姐，佢真係好好，對每一個小朋友都好好，對小朋友嘅事都好上心。因為小小豬唔食得蛋，所以平日茶點都只可以食星星餅，我都係講過一次，SONIA姐姐就已經記得。小小豬唔可以跟佢完成晒成個課程，都覺得好可惜呀！

讀完依個課程我冇再繼續報CPDA，唔係因為CPDA唔好，只係大肥豬話俾小小豬試吓另一間，睇吓會唔會有更多新嘢學到。依家報左一月份幼潛等緊個抽籤結果，希望可以抽到啦！