小小豬愛照鏡

27 NOVEMBER 2011(SUN)

離開左赤柱見時間尚早，所以我地就去左吉吉島行街，因為我想買啲私人服裝。

當我入左去試身室嘅時候，原本剛瞓到矇朦嘅小小豬，一見到塊大鏡就即刻醒晒，立即發揮佢自戀狂本色，不停對住塊鏡古靈精怪咁，小豬媽見狀就即刻拍低佢，睇返到真係勁好笑呀~
依個小小豬玩到伸晒脷，真係好攪笑，實在係係一名可愛傻豬仔嚟呀！

傻行赤柱

27 NOVEMBER 2011(SUN)

今日大肥豬有個朋友結婚要幫手做兄弟，冇理由我一個留係屋企咁慘嘛，所以我就約左小豬媽去玩。因為小豬媽想入赤柱啲鋪頭仔睇啲特色嘅擺設，所以我地三婆孫就入左赤柱行街街啦！

小小豬都算乖仔，係我地行啲鋪頭仔時，佢都冇手多多攪人嘢又或者扭計，全程都好定咁俾我抱住周圍望嘢，都算係咁啦！

抱左小小豬咁耐，都係時候俾佢活動吓。我地一行到去海旁嗰條路，就放佢落地等佢自己行吓。一落地依個傻豬仔就係充滿能量咁自己由街頭行到街尾，全程都係好開心咁手舞足蹈，仲要行得比我地快，所以攪到我都要急急腳咁追佢~

係小小豬行緊海旁路嘅時候，有好幾隻狗仔係佢身邊行過時，小小豬都唔怕咁。其中一隻狗仔係小小豬身邊打轉時，小小豬仲好大膽咁想摸佢，因為狗仔主人怕會整親小小豬，所以拖隻狗仔走，冇得玩呀！(其實嗰一刻我都驚呀)

依個小小豬真係大個仔啦，估唔到佢可以行晒成條路，嗰條路都算幾長，我地大人行都攰啦，但依個小小豬都好似唔覺攰咁，仲想繼續再行咁。不過行完成條海旁路之後，小小豬成面都已經紅卜卜，所以我都唔敢再俾佢繼續行，抱住佢行多一陣就走啦！

今次其實我地都唔係去左好多地方，因為碼頭嗰邊有一個關於酒嘅嘉年華會，我見都好多人，所以冇行入去。睇小小豬今日表現都應該知道佢好開心，等有下次同埋大肥豬一齊入嚟玩過啦！

承諾Bubbles

26 NOVEMBER 2011(SAT)

今朝返工前同小小豬講過話放工帶佢去公園玩BUBBLES，當我地落到公園嘅時候有毛毛雨，所以就被迫要即刻返屋佐冇得玩。

雖然小小豬都只係咁細，未必會明白到承諾係啲乜(又或者根本小小豬都唔我地講過)。不過我覺得依方面係要由細個開始做起，所以我地答應過小小豬，就唔可以冇口齒，唔可以做壞旁樣。所以我地就係屋企出面個走廊玩一陣啦！

雖然只係走廊玩，不過小小豬都係一樣玩得好興奮。有得玩佢就係最開心~

大肥豬仲教小小豬揸槍，有文有路咁呀~

哈哈...因為支BUBBLES槍威力冇另一支咁勁，吹出嚟啲泡泡唔係好多，所以我地都唔算太整污濁個地方，同埋冇阻到其他人呀。當然...下次我地都會去返公園玩，等小小豬可以走動多啲嘛！

雙重打擊

26 NOVEMBER 2011(SAT)

今日真係可以話與到雙重打擊，因為早係上兩個星期去左面試嘅幼稚園都不約而同都寄返個結果俾我地。當然....大家見到我個標題都知係乜事啦！

其實第一間(即係我地最心儀嗰間)，我都估收嘅機會唔大，始終嗰間都係有名氣，環境又好嘅幼稚園，就睇佢地當日面試嘅情況，都知道競爭會係好大。不過既然去得面試，加上小小豬當日表現都算OK，所以都存有有一絲希望可以得到幸福之神眷顧。

另一間就係屋企附近嘅全日制幼稚園，其實當日小小豬表現真係好好，好多老師嘅指引都可以做到，仲同老師有好多交流，所以我都好有信心依間會收，但點知最後都係.....

講真...我真係好失望，尤其係入唔到第一間，當知道嗰一刻真係勁DOWN，從未試過有依一種失落感，真係差少少喊左出嚟。我仲諗會唔會係我啲黑仔王衰氣，所以影響都小小豬入唔到呀！

不過清醒過後，諗返起成件事，雖然真係極度失望，不過當日小小豬表現都好好，我地已經盡左努力，個結果真係唔到我地控制，唯有阿Q啲諗，佢地唔收小小豬係佢地損失啦！

其實我真係好想問，係唔係細B真係咁難入學? 唔係因為依兩間唔收小小豬我先咁諗，因為同左好幾位朋友傾過，佢地BB係同小小豬都係同月份出世，佢地又係IN左好多間都唔收，最後有一位朋友忍唔住間返唔收原因，佢地都話因為係細B所以唔會優先考慮。

嚟緊二月份先會再去兩間IN，趁依段時間我地都會繼續KEEP住教好小小豬，等佢都時會有好表現(放心...我地唔會迫佢，等佢順其自然咁學，唔會俾壓力小小豬)。

試堂

26 NOVEMBER 2011(SAT)

自完成左CPDA嗰個PLAYGROUP之後，我地幫小小豬就報左一月份幼潛嘅PLAYGROUP，依家等緊個抽籤結果，唔知有冇得學。不過前幾日大肥豬同事介紹左係我地屋企附近嘅英文PLAYGROUP班，所以我地都有興趣去睇吓，等依個幾月未有得上幼潛時，都有得返吓PLAYGROUP有嘢學同玩。

佢地有得試堂，所以我地又去八卦一吓。不過個時間就唔係咁好，因為LEV 1嘅課堂係安排左早上九點上，好似太早，不過大肥豬話試吓先，睇吓個感覺先再決定報唔報，所以就約左今日去試堂啦！

由於我今日要返工，所以就大肥豬一個人帶小小豬去上堂。由於課堂係九點開始，小小豬平時都習慣瞓到八點半過後先起身，所以今日要一早叫醒佢，攪到好小小豬係唔夠瞓嘅情況吓返學。

根據大肥豬講，整體上課堂環境都尚算OK，設備都齊全，不過當然冇CPDA咁多啦。由於係英文PLAYGROUP，佢地都係全部以外籍老師教，啲老師都幾好，都叫有耐性。

課堂活動就係先唱遊、講故仔時間、食茶點同埋畫圖畫，依一幅就係今堂小小豬嘅勞作，其實係一棵樹木嚟，不過未出門口就已經爛左，所以我返屋企只係見到依個..哈哈~

講返小小豬表現，可能唔係自然醒瞓唔夠，所以大肥豬話佢好痴身，好多指示都唔多願意去做。不過睇佢依個勞作我都估到，因為平日嘅小小豬好鐘意拎啲顏色筆畫嘢，畫到張紙滿晒先收手呀。

雖然我都好想利用時段俾小小豬上依個英文班，不過經過今日試堂，我都係唔打算JOIN，因為佢未瞓醒就要佢去上堂，好似好慘咁，加上以咁嘅狀態都學唔到嘢啦。

都係為小小豬著想，咁細個唔好要佢咁辛苦，所以繼續再搵啲舒舒服服嘅PLAYGROUP俾佢去玩啦！

反斗奇兵碟

24 NOVEMBER 2011(THU)

OK又有新攪作，買滿$20就可獎抽一次，有機會得到反斗奇兵精品。我對今次嘅精品興趣不大，所以都冇專登去OK買嘢。

不過今日LUNCH之後，入左OK行個圈，就買左少少嘢可以抽獎。一抽之下，我抽中左一隻碟，所以我揀左勞SO熊呀~

我都見到有好多朋友仔抽到依啲碟，不過估唔到我依個黑仔王都有份....哈哈哈！

我的聖誕禮物

21 NOVEMBER 2011(MON)

日前先幫小小豬收到今年第一份生日禮物，估唔到咁快就嚟到我收禮物啦！

第一份收到就係小肥肥送嘅，我好多個第一次收嘅禮物都係佢送，真係...哈哈哈哈~

 
唔好睇佢細細個咁，都幾好聲呀。

第二份就係另一個好妹妹糖糖送嘅~


個充電器又真係幾方便，好啱成日唔記得係屋企叉電嘅我。

依兩份禮物同一個相同點，就係都係IPHONE嘅配件，非常實用，仲可以同小豬媽同LULU妹一齊分享添，所以一個字形容『正』。

兩位好妹妹：多謝你地呀...你地份禮物我都準備好啦，快啲嚟問我拎啦...哈哈哈！

 

 

預早的四周年禮物

20 NOVEMBER 2011(SUN)

仲有兩個星期左右，就到123嘅日子，話咁快就係我地嘅四周年紀念啦。剛好嗰日嘅星期六我又DAY OFF，所以可以帶埋小小豬去玩啦...YEAH！

雖然未到紀念日，不過大肥豬就提早同我去買依一份四周年禮物啦~

哈哈...有幾粒石仔圍住粒大石仔，閃得嚟又唔太誇張，好靚好鐘意呀！多謝老公~

不過..其實依一份都唔係我最想收嘅禮物，大家唔好誤會，我唔係貪心，老公送依隻介子仔俾我已經好驚喜同滿足。只係因為123當日就係我地心儀嗰間幼稚園嘅註冊日(面試時老師講)，所以如果可以係當日幫小小豬辦理埋入學註冊，咁就真係最好嘅禮物嚟呀。

今個星期就會收到信知道個結果，希望依一份期待嘅禮物可以到得到啦...心情真係好緊張呀！

開心公園樂

20 NOVEMBER 2011(SUN)

今日小豬媽同LULU妹又嚟左同我地食晚飯，佢地早左少少過嚟，所以我地一齊同小小豬去公園仔玩。

當我地幫小小豬著好鞋仔之後，佢可能知道會去公園，所以一支箭咁行去門口等我地，仲詔不停話：冇呀...冇呀....，話我地未開門呀~

貪玩嘅小小豬，一落到街就識得自己行去公園仔。可能今次咁多人陪佢玩，所以佢都玩得特別興奮呀~

落得公園玩，又點少得玩泡泡。今次有小豬媽係度，所以可以拍低小小豬玩嘅情況。睇吓依個傻豬仔玩得幾開心(不過...好似我仲開心哦...哈哈)~

嘩哈哈....依個小小豬真係識得逗我，勁SWEET呀~
係我地差唔多準備走嘅時候，依個小小豬就俾左個驚喜我地，估唔到佢去玩都掛住佢至愛嘅英文字(某程度真係好開心，因為小小豬識得依個次序串個英文字出嚟，真係估佢唔到。請容許我唔知醜咁讚吓自己個仔仔先....小小豬真係好叻仔呀)~

雖然短短半個鐘，不過大家都玩得好開心，所以話呢....去邊度玩都好，最緊要一家人一齊，真係點都會開心(哈哈....PRO SIR 大結局上身添)。

我的家在紫禁城

17 NOVEMBER 2011(THU)

早係上個月，收到“何鴻毅家族基金”代表小姐嘅留言，內容係講想送幾本《我的家在紫禁城》嘅書俾小小豬。

其實我對依一套圖書都唔陌生，因為曾經係學校圖書館睇過幾本，覺得好得意之餘又有教育意義，用簡單嘅文字得意嘅圖案講解中國歷史，唔好話小朋友，就連我依個大人都想睇，所以我都非常樂意接受。

今日收到啲書啦~


啲書嘅插圖真係好得意呀~



 
不過...依家嘅小小豬未識得自己睇，所以就先交由我同大肥豬睇住先，等佢大多啲啲，就再同佢講解書入面嘅內容，等佢學多啲中國歷史。

再一次多謝“何鴻毅家族基金”代表小姐嘅厚愛，送啲咁好圖書俾小小豬！

滿足飯局

17 NOVEMBER 2011(THU)

離左左REENEX之後，我地係時代廣場留左一陣，因為有一個BARDIE佈置，所以我都又去八卦一吓影吓相~


依度個佈置我就覺得唔多靚(可能我唔多LIKE BARDIE)，所以影左少少就走啦~






不過其實係露天廣場個佈置靚好多，有好多唔同場景，又好啲波板糖咁。不過因為落大雨，所以就冇影到，等有機會先再影啦！

之後糖糖就帶左我去皇室堡間甘味讚岐手打烏冬食飯~

我地兩個人都ORDER左咁多嘢食，真係勁滿足呀~
 

我依個大鄉理唔係糖糖介紹我都唔知有依間嘢，糖糖真係冇介紹錯，啲嘢食又新鮮又夠味，真係一個唔錯嘅地方，下次有機會可以再嚟呀！

REENEX 體驗

17 NOVEMBER 2011(THU)

之前睇過好多BLOG友仔分享佢地去左REENEX 體驗「膠原自生」療程，睇見到令我心思思想上去試吓。見到有得登記免費試做CPS更生活膚療程(面部)，當然就唔執輸，所以就約埋糖糖一齊上去玩啦！

我地去左銅鑼灣時代廣場嗰間，一入到去，真係有少少驚訝，因為個地方真係好大呀~


嗰度啲服務員都勁有禮貌，一座低就即刻俾左杯花茶，等我地邊填FROM邊飲添~

 原來佢地係一對一服務，所以我同糖糖就分開左，各自跟治療師入房。

美容師先同我講解肌膚的紋理，之後就再替我面部各部位進行分析，看看我的肌膚狀況。一向比較懶惰好少去護理嘅我，竟然俾美容師話我啲皮膚唔差，唔知係唔係逗我歡喜呢~

 

傾左都差唔多一個鐘，之後就去做CPS水基酸療程。間美容房都好大好乾淨，唯一就係全部都係白色，令人聯想到醫院呀~

 

美容師先幫我洗面，之後就在我面塗上水基酸，作用是軟化並去除角質層。當時嘅感覺都唔係好強烈，只係有少少拮拮地的感覺~

 

幾分鐘後，美容師便噴上中和液，以中和水基酸，減少拮拮地感覺~


最後就幫我用凍水敷面，等鎖住水基酸係塊面度，成個過程都只係大約廿分鐘左右。

做完成晒成個過程有乜唔同左，感覺就塊面白淨左啲啲，個額頭同個鼻位好似光滑左少少(我依個樣希望唔好嚇親大家啦)~

 
之後又返入房再傾吓你嘅皮膚問題(當然係SELL嘢時間啦)，一早都諗住係去玩吓，所以佢介紹嗰啲PLAN都冇心機聽，只係知道普普通通嘅 COURS都要萬萬聲咁，真係嚇C人呀！不過佢地可能真係受過長期訓練，都唔算太HARD SELL，明知你係倒亂都唔會黑面，仲好在禮貌咁送你離開。
 
整個過程都很自在很舒服，完全沒有壓逼感，不過....個價錢又真係貴左啲，所以都唔敢JOIN，玩一次就算咁啦！