維園花卉展

一年一度嘅維園花展又開始，今日約左小豬爸同小豬媽一齊去維園行花卉展要去趁下熱鬧啦！

其實花展舉行左咁多年，我都係第一次去添！

我地十二點幾就到達目的地，一去到就見到四周都係人，尤其係主題花佈置嘅地方，仲真係迫到迫唔入，有幾個靚場景我都行唔到入去影添。

雖然好迫，但我都影左少少花花相，不過比起其他朋友仔嘅當然差好遠啦~

除左影花花之外，當然唔少得叫大肥豬幫我影相啦！不過都係嗰句，勁多人，好難影得靚呀~

除左我之外，我都帶左一個D女一齊去影靚相。全日影最多相嘅唔係我，竟然係D女呀。等我整埋好女女靚相之後再同大家分享啦！

一直都以為花展只係得花花展覽，原來都有好多嘢買，我地仲買左好多，大包細包咁走呀！

睇吓我啲戰利品先啦~

買左個五蚊嘅車仔籃，見佢細細個又咁抵，買嚟俾D女玩嘛！

香甜粟米...即場試過真係好甜，所以小豬媽買左幾支返，就俾左兩支等我煮嚟食啦！

蕃茄仔一盆

種花用品

仲有蘭花兩盆，依兩盆蘭花係小豬媽買嚟送俾我呀！因為小豬媽話屋企擺蘭花係好呀！

哈哈...嚟緊我就好好忙，因為要幫啲花花換花盆，等我事成之後再同大家分享啦！

我地係花展入面逗留左三個鐘左右，都真係行都勁攰，仲滿載而歸添。

好在我地早入場，離開時見到好多人係度打蛇餅排隊添，都真係好好彩，唔係仲有排迫呀！