KARY GOOD SHOW

尋晚我地兩個拍拖去左睇KARY演唱會嘅尾場，都係得一個字 – 正！

第一次去STARHALL睇演唱會，環境、音響等各樣都幾好(起碼新嘛！)，不過佢地張櫈就差少少，坐落去唔係太舒服呀！

由開始到完場都冇悶嘅感覺 (可能佢D歌我都幾熟啦！) 成個氣氛好好，加上KARY真係唱得幾好，唱LIVE完全冇走音，KEEP都個水準，仲冇乜見佢飲水休息(通常見D歌星唱完兩首歌之後都要飲水嘛！)。

最勁就係當佢唱快歌時，可以大跳勁舞時都唱到個水準(好夠氣呀！)，仲連跳四首歌都冇停過，唱得完全冇問題，好正呀！

最精彩當然係跳娜姐舞蹈嗰PART，雖然我對英文歌唔太有好感，不過KARY真係跳得好好睇，真係見到佢落足心機練習過嘅。

嘉賓方面一早估到會係側田，因為佢地成日合作嘛！最估唔到就係第二位嘉賓竟然係基仔，可能尾場先係咁安排啦！不過佢地兩個都真係唱LIVE好正呀！

成個演唱會真係好好睇，又邊彈邊唱、又大跳勁舞、又打鼓，唱慢歌又好有感情，真係估唔到佢第一次個人售票演唱會會咁好。雖然只係STARHALL舉行，不過睇今次反應咁好，相信好開就會去紅館開，到時我一定會再入場支持呀！