【茶木新體驗】兩姐妹的Relax Time@TeaWood Deluxe

22 MAY 2019 (WED)

今日下午約左細妹出尖沙咀整啲嘢，咁任務完成就緊係要去醫下個肚，所以就去附近嘅K11搵食，細妹話想想試下佢朋友大力推介嘅珍珠甜品，就係咁我地就入左去TeaWood Deluxe食好啲啦~

TeaWood Deluxe可以話係高級版茶木，佢裝修風格就似高級台式西餐，有格調得嚟仲坐得好舒服添~

先嚟一個威士忌乾炒三杯雞，係上菜時店員會係我地面前將威士忌燒熱，然後倒入餸內~

睇住威士忌係碟內燒熱，又係一個好好嘅視覺享受...哈哈哈~

雞件係單骨雞翼，外脆內嫩嘅雞肉惹味得嚟又帶有少少辣。雖然係用威士忌煮過，但食落只留下少少酒香，入口都唔會太嗆。除左雞件之外，配菜嘅紅椒同洋蔥都好入味呀~

再嚟12小時慢煮牛肋骨台式手作麵·溏心蛋·海苔，聽店員講每日限量供應10碗，好在今日我地早嚟，所以先食到呀~

由於我唔食牛肉，所以依個慢煮牛肋骨就交俾細妹食，不過睇佢一個人差唔多KO成條牛肋骨就知係好味。細妹話個牛肋肉一啲都唔韌，帶少少脂香之餘仲一啲都唔肥膩感~

佢個湯底看似好濃，但入口一啲都唔嗆，鹹味適中而且無油膩感。麵條係粗身手作麵，煙煙韌韌又彈牙唔錯，不得不提佢嘅蘿蔔好入味，正呀~

當然唔少得飲品，我就貪得意叫左支氮氣人蔘烏龍茶，想睇下有氣嘅人蔘烏龍茶係咩味~

淡淡嘅人蔘味加埋烏龍茶，甘甘甜甜又真係幾夾，而且加入左氮氣就有白色細緻泡沫，所以入口就可以茶口感更加細滑~

最後就緊係食我地今次嘅主角MTW黑糖珍珠舒芙蕾班戟配抹茶雪糕~

舒芙蕾班戟入面夾有裡面有吉士忌廉，上面又淋上芝士奶蓋同煙韌珍珠，絕對可以話係班戟版嘅奶蓋黑糖珍珠。班戟口感輕盈鬆軟，再配上芝士奶蓋柔滑同埋珍珠嘅煙韌，朋友真係冇介紹錯，堅好食呀~

不過由於係即叫即製，所以依個舒芙蕾係需要等大約30分鐘，所以都建議要預一預時間，如果唔係都要等比較耐時間啦！

今餐真係食得超滿足，尤其個甜品真係令人極度掛住，搵機會帶埋小小豬嚟試埋佢地其他甜品先得！