【入海洋公園食泰啲】全新泰式餐廳「Ginger Grill 爐炭燒」

16 MAY 2019 (THU)

上次同小小豬嚟海洋公園嚟感受親親動物月時(按此重溫)，都有留意到開左一間泰式新餐廳，當時仲同小小豬講下次入園可以嚟試下食新嘢。估唔到有機會可以嚟Ginger Grill 品嚐一系列最新美食，感覺仲唔係超興奮~

6:30pm後就可以免費入園進餐，係樂園門口會有職員帶我地經特別通道前往餐廳，大約行十分鐘左右就可以嚟到啦！

「Ginger Grill 爐炭燒」原先係禮品店嘅一部分，之後就變成為餐廳後。入面環境以大自然園林為主題，木色主調令人覺得好舒服，就好似猶如置身於大自然中。

我就最鐘意就係佢地座位安排係好寬闊，完全唔會令人有迫迫嘅感覺，真係食都食得暢快啲呀~

「Ginger Grill」主打泰式地道菜式、明火炭燒及多款以薑入饌之料理，單睇MENU見到佢地嘅菜式都已經好吸引呀~

先嚟一杯特色飲品，我依杯無酒精Mocktail「熱帶激情」單看賣相已有驚喜，有菠蘿汁、紅莓汁、梳打加上雪碧，絕對啱晒我依個菠蘿控呀~

係送上食物之前，待應哥哥先為我地送上全自家鮮製嘅五款辣醬(傳統泰式辣醬、泰式南乳薑辣醬、羅望子酸辣汁、泰式南薑豆醬、特色薑味醬及薑黄薄荷沙律醬)，大至小辣由上而下區分不同級數呀~

醬汁架上仲附有建議醬汁與肉類嘅配搭，可以令我地更加提升味覺享受~

先嚟一個「泰式小食拼盤」，入面有斑蘭葉包雞、香茅魚餅、蝦餅、泰式春卷同埋泰式雞寶，五款小食都非常有水準，尤其是那「斑蘭葉包雞」同埋以新豬肉製成嘅「泰式春卷」就最得我歡心~

「傳統泰式沙嗲串」豬牛雞各兩串，經備長炭慢烤，所以更易將肉汁鎖於其中，點埋少少沙嗲醬一齊食就更加滋味~

「燒大頭蝦」我地品嚐嘅係斯里蘭卡大蝦，真係有手掌咁大，而且佢肉質鮮甜又彈牙添~

睇下佢嘅蝦膏超厚身呀~

「美國有骨肉眼扒」依個絕對係今晚嘅重頭戲之一，我地先去睇大廚更即場示範烹調40oz的牛肉眼扒，先以炭火燒鎖緊肉汁~

之後再煮20分鐘，就可以食得啦~

本身我自己就唔食牛，朋友就話個肉味好香濃，而且外焦內嫩，肉質唔"鞋"之餘仲有好多肉汁。眼見朋友仔開心密密食左好幾塊，佢就以行動話俾我知應該係好好味啦~

「炸魚青芒沙律」食泰式菜就一定要食香芒沙律，今次配合原條本地寶石魚，又真係幾特別~

啖啖魚肉再加上青木瓜同香芒絲，辣辣地又酸酸甜甜超惹味，我都忍唔到口食左幾好多呀~

「馬沙文咖喱燴羊膝」依個馬沙文咖喱醬比一般嘅咖哩更香，配合超淋嘅羊膝，估唔到又幾夾哦~

「香茅椰汁雞湯」有好香濃嘅椰奶香，再帶有少少南薑同埋檸檬葉的香，個味好濃郁，真係飲完一碗又想再添多碗~

唔好睇少佢，餸料都好豐富呀~

「泰式燒葵花雞」依個絕對係嘅重頭戲菜式，因為依食佢嘅功夫，因為首先要以秘製香料醃24小時，後以清湯浸泡、再風乾1天，上菜時更會燃點雞身內的香茅枝讓其香味再進一步提升~

雞肉皮脆肉嫩，入口又帶點點香茅香，味就真係唔錯，而且仲有啲蔬菜伴碟，即刻多左一份健康感呢~

「泰式船麵」每日限售150碗，湯底以豬骨熬製兩日而成，加入豬腩肉、豬肉丸等多種豬類食材配料~

最驚喜就係佢嘅脆炸豬皮，細細粒又卜卜脆，不知不覺間我都食左好多塊呀~

「蜜糖薑汁燉蛋」唔好以為勆只係普通嘅薑汁燉蛋，除左有好濃嘅薑汁之外，仲佢加入左粒粒薑蓉，配合埋香滑燉蛋一齊食，口感更加有層次，絕對係我另一誠意推介之選呀~

不過提一提，依個薑汁燉蛋一定要趁熱食，因為如果涼左佢個薑汁就唔會咁出啦~

相信好多人都會覺得入主題公園食嘢係又貴又唔抵食(我間中都有咁諗嘅)，不過嚟完Ginger Grill之後就打消食個念頭，我覺得佢嘅價錢算係合理價，食物質素真心覺得唔錯，而且環境都好舒服，係樂園玩左一整日之後，食返個舒舒服服高質嘅晚餐，都係一個好好嘅安排呀！

More Information : 

Website：https://www.oceanpark.com.hk/ginger-grill