【海邊執垃圾？】做個環保小幫手

5 MAY 2019 (SUN)

我地完成左WWF夏日學堂嘅活動之後，小小豬之後就嚟左一個餘興節目，就係去海邊執垃圾~

事緣小小豬係上次海洋公園親親動物活動中，聽各位哥哥姐姐分享依家海洋環境破壞情況，知道海灘如果有好多垃圾嘅話，就會影響生態環境。就好似水母會誤食垃圾導致死亡，所以就提意不如下次去沙灘或者海灘玩時，都抽少少時間去幫手執走少少垃圾，咁就可以保護為生態環境啦~

一聽到話想去執垃圾，初時我都真係有點……….，不過諗深一層，既然佢有依個心意，再加上又係主動要求，都係一件值得支持嘅事(難得佢唔怕污穢)，所以我都買定小朋友勞工手套，等佢可以做個環保小幫手~

當佢知道今日嚟元州仔時，就千叮萬囑我一定要帶埋小手套，等活動完左就可以去海邊執垃圾~

始終都係第一次，所以開始之前都係叫小小豬執啲大件嘅垃圾，等佢適應下先(其實...係我，作為媽咪既....唔多唔少都有丁點擔心呀)~

初時我都以為小小豬係玩玩下，不過原來佢都好認真，邊行邊留心睇，都執左好幾個膠樽..發泡膠。如果唔係因為開始落雨，我諗隻豬仔都仲繼續係度搵膠樽~

不過我就有點失敗，掛住帶小手套，竟然忘記帶垃圾膠袋，為左唔想小小豬失望，所以我就犧牲左個靚靚環保袋。

但小小豬竟然話「咁仲好啦….我地將啲垃圾放入垃圾桶之後，洗返乾淨環保袋之後又可以再拎嚟執垃圾，咁又可以慳返個垃圾膠袋啦」 。

OMG…..阿仔….洗嗰個係我哦，可唔可以理下我感受呢…不過，算啦....豬仔有依個自發性做媽媽嘅係要行動上支持，所以.....頂硬上啦.....唉~

大家放心...小小豬做完佢工作之後，我都有幫佢徹底消毒，所以都係一件安全嘅事嚟嘅！

好明顯佢係完全係意猶未盡，佢仲話希望下星期天氣會好，咁就可以去沙灘再執好多...好多....好多垃圾，咁啲海邊棲息嘅小動物就唔會受到影響啦！

依隻真係大個仔，識得去實踐學過嘅理論，亦可以將自己想做嘅嘢做好，諗啲嘢都係完全我想像唔到，所以話呢...有時我地大人真係要學懂放手，如果唔係就睇唔到小朋友長大嘅一面！