【小學豬第一次表演】我係小小魔術師

10 MAY 2019 (FRI)

等左兩年....小學豬今年終於有份參加綜藝表演，今次佢化身成為一個小小魔術師，雖然只係其中一Part嘅一個小角色，不過都夠佢開心到彈起~

由初初練習時嘅興奮，到係台上綵排嘅緊張，再到知到將會正式表演嘅壓力，但......小小豬都仍然十分期待自己係上台演出，仲話會盡自己努力做到最好，叫我早啲去排隊霸個靚位，坐定定睇佢 "台上一分鐘。台下十年功" 嘅成果。(邊有十年咁誇......好明顯係執老師口水尾啦...哈哈哈) ~

我只係叫佢係台上ENJOY自己嘅演出就夠，做得幾多就幾多，表演係唔應該有壓力嘛！

小小豬仔今日成朝都囉囉攣，一時話好緊張，一時又話好怕失手俾人笑.....終於等到晚上嘅正式表演~

老實講...佢嘅表現唔可以話係最好，不過佢冇蝦碌嘢又好認真咁去做，係我心目中已經好叻仔，所以我都已經好收貨(俾著我見到台下咁多人，我一定腳震震又手軟啦)~

自己知自己個仔嘅事，小小豬做嘢成日都"論論盡盡"，唔係最精靈醒目嗰一批，發傻絕對係佢經常做嘅事，所以我完全冇諗過可以見到小小豬上台表演。見佢順利完成，眼淺的我又嚟了~

真心的….真係感謝老師揀小小豬去參加表演(老師真係好大膽呀…哈哈哈)，多得佢嘅信任同鼓勵，小小豬先有依個咁好嘅經驗，有返多啲自信心，同埋學懂堅持。所以話….小小豬真係一個好幸福嘅小學豬，有好多超錫佢嘅老師，俾左好多愛佢，令小小豬有一個愉快嘅小學生涯呀~

仲有聽日一場，但我就冇得入場睇，唯有送完佢放學之後再衝返屋企睇直播，希望豬仔繼續努力啦(俾啲信心佢...佢一定得嘅) ！