【消燥潤肺】雪蓮果椰棗海底椰瘦肉湯
2 JANUARY 2019 (WED)
依幾日行街市都見到好多肥嘟嘟嘅雪蓮果,經店主姨姨強力介紹,仲話雪蓮果好有益,可以增強免疫力...降血壓...(下刪好多我都唔記得佢講嘅益處..哈哈)。
我一聽到可以增強免疫力就即刻唔洗諗就入手一個(依家啲忽冷忽熱天氣,真係少啲免疫力都怕小小豬會易病呀),之後店主姨姨仲教我煮依個既可以消燥潤肺、清心降火同埋增強免疫力嘅雪蓮果椰棗海底椰瘦肉湯啦~
雪蓮果係好有藥用價值同埋保健功效,除左可以增強免疫力之外,仲具有潤腸通便,促進消化,調理腸胃;調理血液,清除高血脂,降低血糖、血脂、血壓,有效抑制膽固醇和糖尿病、清熱解毒、防癌及有消炎利尿等功效;椰棗有豐富鎂鐵,食物纖維同埋胡蘿蔔素。另外佢嘅糖分係單純糖,所以就更加容易消化吸收,可以減輕腸胃負擔;海底椰有助清燥熱、止咳、滋陰補腎;紅蘿蔔就有助健脾消食,同埋化痰解毒;粟米就可以益氣補脾;南北杏可止咳下氣,潤燥消積。(網上資料)
雪蓮果一個、椰棗約八粒、海底椰一両、粟米一條、紅蘿蔔一條、南北杏一湯匙及瘦肉約$30 ~
雪蓮果去皮切塊~
粟米及紅蘿蔔去皮切塊~
海底椰、椰棗及南北杏浸洗一陣~
瘦肉洗淨汆水~
煲內放約3L水,然後隨水加入所有材料~
待滾起時,用大火加蓋煲約15分鐘~
之後轉慢火加蓋煲1.5小時~
最後加入少少鹽調味就飲得啦~
店主姨姨真係冇介紹錯,啖湯真係超級清甜,小小豬都話勁好好飲,佢仲一口氣飲左兩大碗(真係好一隻氹C人嘅傻豬仔呀)! 睇見佢飲得開心,又咁欣賞我嘅湯,真係所有正能量都返晒嚟,日日煲俾佢飲我都好樂意呀!
溫馨提示:
由於個別人仕體質不同,所以大家記得煲之前了解下自己,如有疑問,請先向註冊中醫查詢!
沒有留言:
發佈留言