【小丸子花輪陪你做糕】櫻桃小丸子新春工作坊@奇華工作坊

5 JANUARY 2019 (WED)

小小豬平日可以睇嘅電視節目唔多，櫻桃小丸子卡通片就係其中一個，所以佢都好鐘意小丸子，當知道我地嚟奇華工作坊整小丸子蘿蔔糕時，佢都不知幾興奮。

今日返完童軍之後，就以九秒九飛車嚟見佢偶像呀~

還記得上次嚟奇華工作坊就係整小丸子月餅，嗰次嘅製成品小小豬就一個人KO晒(因為佢話好鐘意小丸子哦)，今次就嚟整小丸子臘味蘿蔔糕同埋花輪同學紅棗糖年糕，依隻為食豬又話要全部食晒佢添，佢仲話自己整嘅係特別好味！

我地首先就係整臘味蘿蔔糕，所有份量都已經為我地準備好晒啦~

我地就先睇老師係我地示範先~

睇老師就好似好簡單，唔知小小豬做唔做到呢？依隻豬仔話佢已經大個仔，加上之前又整過一次蘿蔔糕，所以佢話唔洗我地幫手喲。(真係俾佢激C)

首先就當臘肉同臘腸切成粒粒，不過小小豬話啲臘味好硬，都係用較剪方便啲(係呀...我都讚成用較剪，因為睇見佢渣刀.....我真係驚過佢呀)。之後將臘味同埋蝦米混合一齊，之後就可以拎去焗爐焗7分鐘~

然後就將蘿蔔切絲，由於小小豬刀功真係.....，所以基本上都唔係絲狀，應該話係條狀嚟呀~

將啲蘿蔔塊連同導師為我地準備左嘅蘿蔔蓉調味，再放入焗爐焗15分鐘~

之後就要製作粉漿~

最後將已經焗好嘅蘿蔔同臘味加入粉漿內~

將所有粉漿平均倒入兩個小丸子糕兜內~

放入爐內蒸70分鐘~

完成左小丸子蘿蔔糕之後，我地又繼續開工，今次就整花輪同學紅棗糖年糕~

同樣地先睇導師示範，睇材料都係得幾樣以為就會好簡單，但原來都真係唔容易，完全係力得表現呀~

之後就到小小豬自己做，坦白講....整依個紅棗蓉真係一啲都唔易~

因為要將已經用庶糖煮好嘅紅棗親手磨成棗蓉，唔用啲力都真係磨唔到，小小豬由好興奮地磨到最後........佢話磨到手好攰~

好有遇到位好導師，佢見小小豬開始想放棄時，就即刻行過嚟好有耐性咁鼓勵佢要繼續完成，仲陪佢齊齊整添~

我地嘅紅棗蓉終於完成，真係滴滴皆辛苦呀(不過啲紅棗真係勁香，辛苦啲都值得)~

之後就用啲紅棗蓉加埋啲粉整個粉漿~

之後就可以放入攪拌機拌勻啦~

再將年糕加入花輪同學糕兜內~

就可以拎去焗爐焗60分鐘啦~

係得兩份糕點出爐嘅時候，工作人員就煎左好多唔同種類嘅賀年糕點俾我地分享~

當然....依個亦都係影靚相嘅好時機啦~

今日仲有個小驚喜，當我地同緊紙板小丸子影相時，突然間身後就見到小丸子及花輪同學，我同小小豬都超興奮，當然要即刻集郵啦~

小丸子仲派利是俾小朋友添~

玩完一輪，時間又剛剛好，我地嘅蘿蔔糕出爐啦~

底部有個小丸子頭呀(小小豬已經計畫好食完蘿蔔糕之後要留返個糕兜，用嚟整啫喱。哈哈...你咁環保我實支持)~

蘿蔔糕實在太香，所以有個小朋友急不及待要偷食啦~

另一款嘅紅棗糖年糕都出爐啦~

待糕點涼之後，我地就帶埋我地嘅製成品返屋企啦~

真心覺得係好好玩，一切由零開始，小朋友自己切粒粒同做粉漿，最重要係自己要磨紅棗蓉，絕對係滴滴皆辛苦，所以真係一個好體驗。

小小豬仲有點意猶未盡，所以我地即晚都上網報名參加二月嘅熊貓鮮奶撻(行動證明...好玩嘅嘢真係會自費再encore..哈哈哈)，到時又可以嚟再玩過呀！

More Information：
櫻桃小丸子臘味蘿蔔糕+紅棗糖年糕班 • 課程可製作櫻桃小丸子蘿蔔糕(淨重量約300克)及花輪同學紅棗糖年糕(淨重量約300克)各2底 
• 附送精美櫻桃小丸子A4文件夾、櫻桃小丸子揮春 (一套四張)、櫻桃小丸子利是封 (一套十個)乙份 
• 附送櫻桃小丸子年糕包裝盒2個

成人班 $550
親子班 $600 
課程時間：180 分鐘
成人班>> http://bit.ly/2ETvgOg
親子班>> http://bit.ly/2ETvll2
奇華餅家工作坊：灣仔皇后大道東188號2樓