【 親親動物月】海洋公園一天遊

16 APRIL 2017(SUN)

放復活節假期緊係又要去玩，今日就約埋SY哥哥齊齊嚟睇動物玩餐飽啦~

 

其實海洋公園為係4月14日至5月14日就舉行「親親動物月」活動，我地平日都成日入嚟睇動物，不過依個月就有啲唔同，因為可以同動物近距離接觸，同埋會有好多職員哥哥姐姐同我地講解各動物嘅特性呀！

原本小小豬想去探樂樂同盈盈，點知因為佢地準備生BB所以封左館，之後我地就轉戰睇金魚啦~ 

 

職員哥哥見到小小豬咁留心睇魚，所以就嚟同小小豬慢慢講解，我地眼睇就好似每一條魚都係差唔多，不過係哥哥心目中原來每一條都有特式，而且每一條仲有名添，真係唔聽講解都唔知呀~ 

 

之後我地就去睇天上王者~ 

 

大半年前小小豬都睇過，不過當時佢點到唔肯去同鸚鹉影相，今次終於大個仔勇去影相，而且仲好想摸佢地添(當然大會係唔容許啦)~

 

之後我地就匯合SY哥哥，齊齊去睇企鵝~

 

仲有去睇北極狐，去到剛剛有職員哥哥餵食，隔住玻璃睇佢地餵北極狐同埋表演玩蒸餾水樽..哈哈哈~

 

接住就當然係去北極之旅睇海豹~ 

 

行到最後又見到一位職員姐姐為我地詳細講解海豹特性~

 

終於等到兩位小朋友期待好耐嘅環節(重點係完全免費)，可以同水獺玩遊戲啦~

 

首先就由職員哥哥同水獺熱身先~ 

 

之後主角就出嚟同大家見面啦~

 

職員哥哥先同我地講解水獺嘅習慣，然後就可以挑選一位現場人仕同水獺握握手。原本我係想幫小小豬爭取依個機會，不過因為怕小朋友或會傷害了小動物，所以只有成人先可以同水獺真接觸。所以機會就俾左我啦，水獺滑滑嘅手仔真係好得意呀~

 

我就極度興奮完之後，終於又嚟到兩小朋友嘅興奮時刻，因為兒童天地入面嘅新兒童遊戲部分已經開左，兩個小朋友就當然要去放電啦~

 

玩完遊樂場就再睇埋威威海洋SHOW~

 

正當我地一行六人玩到攰準備走嘅時候，驚喜又嚟啦，因為見到有貓頭鷹同二趾樹懶呀~ 

 

正當我地準備9秒9衝上前合照之際，職員哥哥就話為免嚇親兩隻動物，所以要保持距離影相呀~ 不過都啱嘅，咁個人如果個個都近距離接解，小動物生命都唔長久，所以同佢地保持距離都正確呀~ 

 

今次都係第一次近距離見到貓頭鷹同二趾樹懶，所以都幾興奮呀~

 

開開心心又玩左一日，其實小小豬都有啲未夠喉(但我地都玩左六個鐘哦)，唔緊要....下次再約過SY哥哥嚟玩過啦！