【飯後歎一歎】初嘗抹茶館

13 OCTOBER 2016(THU)

今晚約左朋友去九龍灣食飯，路經抹茶館竟然唔使排隊，見小小豬默書又攞到滿分，所以就獎勵齊齊入去食雪糕做甜品啦~

 

依隻為食豬，未坐定定就已經諗定要食咩啦~ 

 

我之前都已經好想嚟試，因為聽朋友講佢既綠茶雪糕係好好味，不過每次行過見到都大排長龍，終於係今日無預期之下，可以試到啦~

 

小小豬叫左一個牛奶雪糕甜筒，我覺得牛奶味係唔錯，好香濃之餘又夠滑身。不過我略嫌佢個雪糕筒比較淋身，食唔到好脆嗰個雪糕筒口感，所以扣少少分啦~ 

 

我就當然係食佢最出名嘅抹茶雪糕啦(唔好意思唔記得咗佢個全名……哈哈)~

 

依為食豬又嚟啦，睇咗我雪糕上面嗰啲生果~ 

 

佢個抹茶味都幾香濃，而且入口都冇啲苦澀味，再加埋啲紅豆蓉一齊食，兩者都好夾味道唔錯。不過我個人就比較鍾意白玉丸子， 煙煙韌韌好好食呀~ 

 
由於時間關係(第二朝要返學係唔可以去太夜㗎)，所以都唔可以慢慢歎， 其實我仲好想試佢嗰一個日式甜點便當， 唯有留返下一次再嚟試啦！

**我地的FACEBOOK PAGE，齊齊來交流親子。育兒。烹飪啦**