【增強免疫力】太子參螺頭瘦肉湯

6 OCTOBER 2016(THU)

依排開始轉天氣，早晚又帶少少涼風，早前小小豬都好慘慘豬咁病左幾日，病好就當然要好好調理，要增強免疫力，咁就唔會再病呀！

病好左嘅小小豬緊係要補補佢，所以就煲依個太子參螺頭瘦肉湯啦~
 
今次主要係以太子參為主，佢性質溫和而且補而不燥，同時亦有助增強免疫力，可以用於病後修護、調理身體。最啱小朋友、陰虛内熱體質同樣適合。 

海竹頭、麥冬、沙參就可以滋養氣血、養陰生津同埋潤肺止咳。再加埋滋陰補腎嘅乾螺頭，咁就可以變成好啱小朋友增強免疫力嘅靚湯啦！

材料就需要以下幾樣：太子參1両乾、螺頭10粒、沙參1両、海竹頭2両、淮山10塊、麥冬1両、陳皮1塊及豬肉眼約$40~

 

陳皮用水浸軟刮瓤；乾螺頭用清水放在雪櫃浸一晚~ 

 

瘦肉洗淨汆水；其他藥材用清水浸10 分鐘，隔水備用~ 

 

煲內放約4L水，然後隨水加入果皮~ 

 

待滾起後，加入其他材料~ 

 

用大火加蓋煲約30分鐘~

 

再轉慢火加蓋煲多1個半小時~  

 

最後加少少鹽就飲得啦，唔好以為全部都係藥材啖湯一定好藥味，由於太子參個味唔濃，其他藥材都係啲溫和，再加埋螺頭個清甜，所以啖湯都係好甜，小小豬都好鐘意飲呀~

 
溫馨提示：由於材料都涉及藥材成分，所以係好因應個人體質，大家記得煲之前了解下自己，或者問下相熟中醫/藥材店職員，呢個湯料啱唔啱自己呀！

**我地的FACEBOOK PAGE，齊齊來交流親子。育兒。烹飪啦**