暑假總要入嚟迪迪尼

25 AUGUST 2015(TUE)

等到差唔多暑假尾，終於搵到一個時間可以入迪迪尼大玩特玩。大大話話都有成三個月冇入嚟，小小豬仲唔開心到跳起啦~

往年暑期我同小小豬都總係會入迪迪尼玩幾次，不過今年俾DADDY安排左要去上暑期班，雖然都只係每日一堂一小時，但我又唔想趕嚟趕去咁玩，所以就等啲課堂完晒，先入嚟暢快咁玩啦！ 

入到嚟就差唔多睇巡遊，所以我地就搵個靚位等下先啦~

其實每次嚟睇巡遊都係指定動作，睇到睇到熟晒，但係都唔明白黠解每次小小豬都仲係睇到咁興奮又入神，或者依啲就係小朋友可愛之處啦~

一聽到某一段音樂，小小豬就自動自覺咁起身~

因為佢要跟哥哥姐姐去跳舞，好在今日都唔算多人，所以小小豬都可以出到去玩，因為佢睇巡遊都係為左依個Happy Moment呀~

睇完巡遊當然又係去指定活動，掛隊入去睇小小世界啦~

之後我地慢慢行...慢慢行~

行去排隊玩飛碟，不過估唔到一個小小飛碟遊戲都要掛30分鐘，好在依半個鐘小小豬都好乖乖咁排，仲成日扮晒古靈精怪樣俾我影，等我打發啲時間~

接住我地兩母子就做左入迪迪尼嘅第一次，就係入餐廳撐枱腳啦~

真係實不相暪，我入左迪迪尼玩咁多年，都係第一次入依間餐廳，一於趁就係生日豪一豪佢，同小小豬入去食個小食休息下啦~

依隻熱情豬一見到服務姐姐就拖住去搵位啦~

第一次入嚟小小豬都勁興奮哦~

成間餐廳個環境都好舒服，同埋好靚呀~

睇下食咩先，最後我地ORDER左一杯凍飲同一份雪糕~

開餐啦~

先嚟我嘅DUFFY朱古力特飲~

朱古力當然冇小小豬份，不過佢主動要影相(其實係佢睇中左那條蛋卷就真)~

之後就到小小豬嘅雪糕了(個名唔記得左)~

有三球雪糕~

仲有少少芒果同一粒馬卡龍，粒DUFFY馬卡龍又真係唔錯，唔會好甜，一粒真係唔夠喉~

雪糕唔洗我講，睇小小豬個食相就知有幾好食啦~

都算依隻豬有少少良心，雪糕上嘅朱古力都俾我食~

雖然只係簡簡單單兩樣嘢食就已經二百幾蚊，老實講又真係貴左啲啲。不過，其實個環境都好舒服，所以間唔中豪一次半次啦！

食飽飽就去玩啦，上幾次入園都冇玩水，今次終於有得玩啦！依隻豬仔為玩水都人做足準備，要我帶埋拖鞋入園。唉...又要我拎多一樣嘢就真，不過見隻豬仔玩得咁開心，麻煩少少都值呀~

換好晒衫之後，我地就繼續去玩，路過見到哥哥畫畫，小小豬又睇埋一份啦~

原本打算玩彈弓狗，不過勁多人，排起碼排90分鐘，所以都係路過影相算~

最後去左玩迷離莊園，上幾次玩小小豬都好ENJOY，點知今次竟然驚，全程捉到我實呀~

原本我地打算快快手去食完晚餐之後去睇夜晚巡遊，點知行到去彈弓狗見冇人，所以最後小小豬就放棄睇巡遊，玩返轉先~

就係依個時候，老公放工入到嚟，就係佢等我地玩彈弓狗時，佢一個人走左去玩沖天車。平日叫佢陪我玩就唔肯，自己一個就走去玩，真係激C我呀~

老公嚟到我就輕鬆晒，因為小小豬玩咩都要DADDY陪嘛~

唔覺唔覺都玩左六個鐘先走，我地邊行邊走睇煙花啦~

今日全日都陪小小豬玩，就連搵公仔影相都冇，唔好話去FROZEN VILLAGE。坦白講，每一次入迪迪尼其實我地都係做埋同一樣嘢，玩都係玩相同嘅GAME，雖然看似有點悶，不過見小小豬每次入嚟都玩得咁開心，加埋佢依個迪迪尼控媽咪，所以嚟幾多次我都唔覺悶呀！