我的快樂生日：開心打邊爐

26 AUGUST 2015(WED)

係海洋公園玩左大半日，玩到都攰攰地，所以係時候要去醫肚。生日就有少少大晒，所以老公就帶我去做我至愛嘅嘢，就係去打邊爐啦~

其實上嗰幾次嚟apm我都已經好想入嚟打邊爐，不過次次行嚟都勁多人，要排隊食嘢就一定唔啱我地。今日早嚟到又唔洗排隊，當然即刻入去食啦~

我地今日豪豪地，叫左個海鮮邊爐餐~

啲食物都算幾新鮮，整體上都唔哦~

我地套餐仲包飲品同糖水任食任飲添~

當然唔少得添醬區，種類都好多呀~

嘩哈哈...開餐了，依個小小豬都不知幾興奮，仲開心過我呀~

真係唔好睇少依個套餐，嗰一個海鮮盤，都算總類多之餘，佢嘅分量都唔少，我地三個人食都飽飽咁離開，超級滿足呀！

生日點都要吹下蠟燭啦，不過係海洋公園玩左成日，之後去食我至愛嘅邊爐宴，冇晒蛋糕買啦！

最後....老公用原盒雪糕扮偽雪糕蛋糕送俾我，咁都叫可以吹蠟燭，許個願啦~

仲有一件超攪笑事，話說今日食午餐時，我問小小豬送咩生日禮物俾我，佢諗左好耐(好認真MODE)，佢就話：不如我送封利是俾你，我生日公公都係送利是俾我啦！

就係咁...返到屋企就問DADDY拎利是封，仲係佢個DUFFY包包，好"豪"地拎左一張十蚊放入利是送俾我。見到依個情景，都唔知好嬲定好笑，不過都係小小豬嘅心意，所以依封利是真係要好好KEEP起呀...哈哈哈~

我嘅N歲生日就咁就過左，其實我對生日都慢慢冇感覺，只係多左一日去玩嘅機會。其實....只要生活過得開心，日日都係生日啦！