開心暢玩在石澳

23 AUGUST 2015(SUN)

原本今日打算一行八人齊齊去海洋公園玩夏水禮，點知勁塞車之餘停車場又冇晒位，最後唯有一改行程，去石澳玩水啦！

不過，依隻懶玩豬狂歡程度有增冇減，佢都不知幾興奮呀~

今日可能係勁好天氣，所以就算係石澳都係勁多人，好唔容易先搵到個基地位置。

先嚟身玩下沙先~

玩左一陣就已經急不及待要去玩水，拎住兩個桶仔加埋心口個勇字就走出去玩，仲越行越出，真係俾佢嚇C呀~

今日真係好在嘉汶表妹同細路在場，有佢地著埋泳衣陪住小小豬玩，先可以咁開心，依隻豬仔成日捉住表姨玩跳浪，真係都唔知點解佢可以咁大膽呀~

哈哈哈...其實我今日都用左山狗(即係防水嗰啲攝錄機)，我睇返啲片段都覺得佢地玩得係勁開心。不過，佢地唔太方便出鏡，所以留俾我自已珍藏啦！

來來回回玩下沙又玩下水，依隻豬真係可以話玩到忘我，唔捨得走呀~

依隻醒目豬最後出動公公力量，係佢好努力游說下，終於都可以玩多十五分鐘先走呀~

雖然我地只係玩左兩個幾鐘，不過依段時間又真係玩得好開心，因為最開心莫過於一家人開開心心咁去玩。

小小豬真係一個好幸福嘅小朋友，基本上今日所有人都係陪佢嚟玩，姨姨就買沙灘蓆俾佢坐，表姨怕佢晒就借太陽傘俾佢用，舅父直頭衫都未換就同佢落水玩，所有屋企人都對佢萬千寵愛，真係要叫小小豬好好好珍惜依一份愛呀！