A貨版蛋黃哥牛奶布甸

10 SEPTEMBER 2015(THU)

又到左每月十號，小小豬六十一個月大，真係唔覺唔覺又咁大個啦！今日見有少少時間，所以又嚟同小小豬整下甜品開心下啦，睇唔睇到係咩甜品嚟呢~

哈哈哈...上排見好多朋友仔去左蛋黃哥餐廳食嘢，我都好想去試下，不過一諗起要排成個幾鐘先食到個包包，即刻唔致啦！

不過，見佢地有個甜品好似好易整，所以我又嚟試下，整個A貨版蛋黃哥牛奶有布甸啦~

其實我嘅諗法又真係好似好易，我就用番上次整櫻花奶凍個方法(按此重溫)，之後就整埋個蛋黃，加埋啲圖案，咁就完成啦！

首先用凍水浸軟兩片魚膠片(魚膠片每片2.5g)~

然後將一盒470ml嘅鮮奶用細火煮熱，加入已經浸軟嘅魚膠粉及2茶匙糖(糖可以因應個人口味加減的哦)~

之後就慢慢攪，攪拌至魚膠粉及糖完全溶解~

放涼一陣之後，就可以倒入杯，再放入雪櫃至凝固~

大約雪左三個鐘左右，奶凍部分就整好，可以整埋個下半場啦~

首先用熱水浸軟支朱古力先~

係依個時候就要整個蛋黃，原本我係想用芒果溶嚟整，不過買唔到平平地嘅芒果嚟整，所以最後就利用芒果雪糕啦。

用個匙羹嚟整半圓形，雖然係差少少，不過頂住先啦~

之後就用朱古力筆劃埋啲眼睛同咀~

A貨版蛋黃哥牛奶有布甸完成啦~

小小豬都話幾得意呀~

當然....最吸引佢嘅就一定係嗰個雪糕啦~

布甸個質感都唔錯，都幾滑滑呀~

 今次A貨版蛋黃哥牛奶布甸當然仍然有改善空間，唔可以話係100%似，但都叫做有個樣睇下呀...哈哈哈！