花甲蒸滑蛋

22 SEPTEMBER 2015(TUE)

其實我係好鐘意食花甲，係網上見到有朋友仔整左個花甲蒸滑蛋，睇見好靚又好易整咁，所以我又嚟自己試下整，原來真係幾好味.....大愛呀~

材料只需要花甲一斤、蛋3隻及上湯一包(250ml)~

首先將花甲用鹽水浸泡最少3小時~

煲滾水後，再花甲煮至開口~

然後將已煮熟嘅花甲排好放上碟~

將三隻雞蛋及上湯拌勻~

然後慢慢將蛋汁倒入碟中~

最後包上保鮮紙/蓋錫箔紙，用中火蒸8分鐘~

成功啦....出爐啦~

估唔到簡簡單單又真係好好味，啲花甲好鮮甜，蛋又好滑，就連老公都大讚好味，仲話有啲似某壽司店嘅蒸蛋添~

哈哈哈...唔係自己讚自己，整體上又真係唔錯，鐘意食花甲嘅朋友仔可以一試呀！

沙參玉竹雪耳湯

22 SEPTEMBER 2015(TUE)

在秋天將至，當然要煲啲清潤嘅湯水打打底。加上小小豬依排又勁鐘意飲湯，每次都飲兩大碗，所以又係一個動力令我密密煲。

今日就煲左好啱預防秋燥嘅湯，就係沙參玉竹雪耳湯~

由於雪耳係唔可以隔食飲，所以我都唔係煲左好多，大約係夠我地三口子每人飲兩碗左右啦！

材料包括有，沙參、玉竹、雪耳、南北杏、蜜棗、果皮少少及豬肉約$40，份量方面我就同藥材店職員講大約幾多人飲，佢就會幫你執所需份量啦~

瘦肉洗淨汆水備用~

果皮浸透去囊~

雪耳浸軟剪切塊~

煲內放約2L水，然後隨水加入果皮~

待水滾後加入所有材料，先用猛火煲半小時~

之後轉用慢火再煲一小時~

最後加少少鹽調味，可以飲得啦~

秋天係好需要預防同滋潤嘅時候，個底打得好，咁係冬天就唔咁易燥同爆擦，所以真係要趁依家潤多啲。

而且沙參能養胃津清肺熱，玉竹可潤燥止渴，雪耳滋補養氣。所以依個湯有潤燥滋陰，對皮膚亦有益，但如果感冒者就暫時不宜飲用啦！

浪漫嘅法國餐@Le Marron

21 SEPTEMBER 2015(MON)

今晚又係一個輕輕鬆鬆嘅晚上，相約幾位朋友仔出嚟食飯傾下計。今次朋友仔帶我去一間勁浪漫嘅法國餐廳，話事話....我咁大個女都係第一次食法國菜呀~

一入到去就已經俾餐廳內環境吸引住，整個佈置真係勁靚，好浪漫嘅感覺呀~

我地一行四人就先係一個咁好嘅環境下開始用餐啦~

頭盤嘅法式焗田螺配蒜蓉香草牛油~
田螺肉好容易就可以取出，佢嘅肉質又軟又嫩滑，連埋啲蒜蓉香草薯蓉一齊食汁，都真係幾好味呀！

另一個頭盤就係香煎鵝肝伴蘋果酒燴蘋果圈配砵酒汁~

坦白講我都係第一次食鵝肝，估唔到肥啫啫鵝肝煎得外層有少少乾身但內裡仲係軟綿綿，而且一啲騷味都無。配埋甜甜嘅蘋果一齊食，好似中和左鵝肝嘅一種油膩，真係令我好回味呀！

傳統法式芝士焗洋蔥湯~

酥皮湯可以話係我至愛，酥皮加厚厚嘅芝士做皮都係第一次試，雖然看似厚厚的芝士人但其實加埋啲湯一齊飲，一啲都唔覺得好膩，配合埋超多料嘅洋蔥湯一齊飲，感覺真係好清甜，推介呀！

食完頭盤餐湯，店員就為我地送上小小嘅檸檬雪芭，等我地清下個味蕾，繼續食主菜啦~

香煎美國極黑毛豬配黑椒汁~

依個黑毛豬真係可以話我其中一個喜愛菜式，可能係黑毛豬關係，佢肉質都幾厚身，而且好好香嘅豬味，配合埋個黑椒汁一齊食，啖啖肉仲好JUICY添！

香煎新鮮智利鱸魚伴芹菜頭茸配蜜桃汁~

鱸魚嘅質感很鬆軟，不過我個人就比較鐘意食下面嗰啲薯蓉多啲，佢個口感真係勁幼滑，真係好食停唔到口。

芝士焗南瓜鮮蟹肉意大利飯~
單睇賣相都已經好吸引，好香濃嘅芝士味加埋勁多嘅新鮮蟹肉再同啲南瓜及飯一齊煮，而且軟硬適中，食落又啖啖肉，真心推介呀！

最後當然唔少得甜品時間啦！

法式焦糖燉蛋~

其實我真係好鐘意食焦糖燉蛋，所以每次都一定點依個甜品。今次都幾好食，蛋香味都好濃郁，焦糖個厚度都剛剛好好，整體上香脆而不甜。

焗芒果疏乎里~

疏乎厘口感軟滑同鬆化，而且味道不會太甜，平日唔多愛食疏乎厘的我都食唔少呀...哈哈哈。

開開心心又過左一個晚上，朋友仔介紹又真係唔錯，食物好味環境又好，等我搵個機會捉老公拍拖嚟食返轉，溫馨浪漫一返先得！

老大街「型」中秋@大本型

20 SEPTEMBER 2015(SUN)

謝謝大本型邀請我地嚟參加「型」中秋體驗日，齊齊試整經典懷舊零食，仲可以同埋SY哥哥同魚子醬齊齊懷舊一返添~

其實叮叮糖同龍鬍糖都係我好鐘意食嘅懷舊零食，平日行過見到都會買啲嚟懷舊食。所以當PR姐姐問我有冇嚟學整時，我當然二話不說咁答應，因為平日可以親手整嘅機會真係唔會有嘛！

我地見仲有少少時間先開始活動，所以就先去空中花園睇下啲燈籠先。空中花園周圍都掛著好多唔同大大小小、色彩繽紛的燈籠，而中央那個蓮花燈的直徑達5米添，我想如果係晚上開著左燈時一定會更加靚呀~

睇完燈籠影完相，兩位小朋友跑一陣，我地就返落大堂去學整糖啦~

我地首先就去學整叮叮糖，睇完姐姐用鏍絲批同士巴拿嘅示範，然後就到我地啄啄啄啦~

原來叮叮糖就係咁簡單，啄幾下就完成~

之後我地就去整龍鬚糖，睇師傅表演就好似好易，由一片麥芽糖拉成絲，再由1變2...2變4...最後就拉到一萬八千幾條絲啦~

睇完師傅原範，之後我地嘅工作就係，係啲絲絲包上花生粒。雞手鴨腳的我都叫做包到啦~

小小豬都有份包，不過當然就......細細粒容易食啦...哈哈哈~

我兩嘅製成品，其實都叫做見得下人啦~

依家只要係9月26及27日，係大本型消費滿$100，就可以免費換取師傅手拉龍鬚糖及叮叮糖啦！

整完嘢食，我地就好像走入左時光機，係老大街嘅洋服店、錢莊、舊式士多、茶樓、冰室、書報攤及小攤檔影靚相啦~

原來大本型為左今個老大街「型」中秋活動，都推出左好多唔同節目及禮物換領呀~

 

More Information :

Website：http://www.domain-mall.hk/
Facebook：https://www.facebook.com/DomainHK