無水海鮮鍋

21 JULY 2015(TUE)

小小豬係度整乜整到咁開心，仲要整個衰衰樣呀？咪就係依期好HIT嘅無水海鮮鍋，佢仲話佢自己係大廚添呀~

我想試整無水海鮮鍋好耐，雖然係好易整，不過之前小小豬放學返嚟再去買海鮮後再洗洗洗，一定唔係好夠時間，所以趁放假可以早啲去買餸，咁就有足夠時間啦~

整個過程其實真係勁簡單，我覺得最辛苦及用時間嘅，就一定係洗依個程序，始終海鮮一定要洗得乾淨啲先得嘛！

將蝦洗乾淨，然後剪走蝦頭及蝦腳~

蜆放入約鹽於水中浸約30分鐘，以便吐沙~

鮑魚去內臟再用牙刷清洗乾淨~

蟹同樣去內臟用牙刷刷乾淨~

蘿蔔去皮切件~

西蘭花切小棵之後用鹽水洗乾淨~

所有材料準備好，就到我地大廚出場啦！

首先係底層排好蘿蔔片~

之後就到放蜆~

排靚靚啲蝦~

跟住就到蟹~

仲有鮑魚~

最後就加入少少西蘭花~

小小豬有份整冇份食嘅排排海鮮鍋~

最後就關上蓋，先用大火煮兩分鐘，之後轉細火25分鐘，中途千萬唔好開蓋呀~

我戰戰竸竸咁等左半個鐘，終於煮好有得食啦~

先嚟講下全鍋最敗筆之處...就係啲西蘭花，可能焗得太耐OVER晒，所以我係要提下大家，一定唔好學我落西蘭花呀！

味道方面我覺得啲海鮮係有一種甜味，但食落又唔覺好似睇朋友仔講到咁"叮"一聲嗰種鮮甜~

不過，相信我都係煮一次就算，因為老公唔太鐘意咁食法，佢話分開煮炒蜆...蒸鮑魚呀....依啲仲滋味哦，真係俾佢激C呀！

椰汁芒果蛋蛋

20 JULY 2015(MON)

小小豬終於開始放暑假，今日見有時間，所以就同小小豬嚟返親子廚房一整嘢食，大家估唔估到我地整左啲咩甜品呢~

哈哈哈...依個其實係椰汁芒果蛋蛋，係唔係好似蛋蛋呢？材料同整法都唔難，只需要椰漿、清水、砂糖、魚膠粉同芒果漿呀~

但其實係咁多材料中我最難搵嘅就係個蛋蛋模，首先我覺只做幾次就買一個硬模就好似唔抵(同埋驚買左返嚟唔成功咪大件事)。之後我就諗到用出奇蛋個殼，但...小小豬唔食得朱古力，所以我唔會買嚟食。最後同朋友傾談間，原來佢小朋友都有食出奇蛋，所以佢就留左啲蛋殼俾我啦~

首先我地就用椰漿整蛋白部分，先用椰漿及清水各200ml混合埋一齊~

然後加入2湯匙砂糖~

準備30g魚膠粉~

將魚膠粉慢慢加入椰汁內~

最後，將椰汁糖水放入煲中，以中小火將魚膠再煮溶~

待涼後就可以倒入蛋模冷藏凝固，如果怕啲蛋殼企唔定，可以用剪開細細的廁紙筒嚟盛住呀(哈哈哈...其實依個甜品都係一個好好嘅廢物利用例子呀)~

係等待蛋白凝固時，我地就開始整個蛋黃。不過依個時候因為小小豬去左學彈，所以下半場就由我接手啦！

蛋黃其實係由芒果嚟，首先準備150g芒果肉再打成芒果漿~

之後放入煲中，加入12g魚膠粉以中小火煮溶~

熄火稍放涼備用(記得一定要涼晒先可以加入椰汁內呀)~

取出已凝固的椰汁蛋白，用匙在中間慢慢挖出一個圓蛋洞，再把放涼的芒果液填入洞內~

再冷凍至凝固後，椰汁芒果蛋蛋就完成啦~

學完琴返嚟嘅小小豬見到都不知幾攪笑，即刻同我講：『MaMi....我都唔食得雞蛋，仲咩俾我食呀？』~

哈哈哈...其實依隻豬仔係知道咩嚟，只係攪攪陣呀~

好玩又攪笑嘅甜品，最好就係完全唔覺得難(其實...難我都唔會整啦...哈哈哈)，大家趁暑假都可以同小朋友一齊做呀！

《魔雪奇緣》3D魔幻館

20 JULY 2015(MON)

小小豬正式開始放暑假了，第一天假期節目，就係相約姨姨一齊去3D魔幻館搵ELSA、ANNA同小白！

其實...影相控的我，當知道有依個3D館時，就已經勁想嚟玩一轉，所以當收到MegaBox邀請時，真係勁興奮呀~

3D館我都去過幾個，每一個我地覺得好好玩，因為影3D相係要夠扮嘢又夠放先叫影得貼題嘛！

但如果講期待，又真係可以話係依個FROZEN館，一嚟我依名迪迪尼粉當然係至愛迪迪尼出品，二嚟小小豬鐘意小白，好期待佢見到咁多小白3D相，佢會有幾開心~

其實《魔雪奇緣》3D魔幻館主要係以電影內嘅情節嚟做成立體背景，所以一入到去就已經好有熟識感覺(其實...我自己一個人都唔係睇左好多次，一隻手都數得晒呀...哈哈)！

全場大約有三十多個FROZEN佈置，小小豬一入到場就已經開左MOOD，可以開始影/玩啦！

一開始就已經幾入戲哦~

哈哈哈...先去搵下ANNA先~

點少得ELSA呀~

最後當然唔少得小小豬至愛嘅小白啦~

超鐘意依張相，小小豬好交到戲，感覺好WARM呀~

小小豬仲睇中左馴鹿斯，要求同佢影相呀~

開開心心又玩左一個上午，其實3D魔幻館內唔止我分享嘅咁少，仲有啲因為場景黑左少少，我部傻瓜機影出嚟唔多靚。後來問返在場職員，原來佢地係專登係某啲場位調教燈光，等我地可以感受冰雪嘅氣氛~

哈哈哈...原來係專登嘅，咁就只好怪我今日懶懶地只係帶左傻瓜機嚟影。所以係度提提各位將會去嘅朋友仔，記得帶部靚機去影呀！

 

More Information :
MegaBox
Website：http://www.megabox.com.hk/
Facebook：https://www.facebook.com/megaboxhk

3D魔幻館
Website：http://3dhk.com.hk/
Facebook：https://www.facebook.com/3danimationgallery