聖誕小天使

24 DECEMBER 2014(SAT)

今個平安夜小小豬變身成為一個小天使，同一班小朋友一齊去報佳音！

一見到小小豬依個可愛天使LOOK，真係忍唔住要同佢影番張相呀~

小小豬一換左件小天使衫之後，真係可愛左好多(又嚟唔知醜媽媽係度讚個仔啦)，扮埋個小樂器上手，邊唱邊搖，真係冧C我呀啦~

綵排左一陣，有一個神秘嘉賓嚟同班小朋友玩，就係由其中一位神父扮聖誕老人呀~

小小豬嘅神奇事就由見到聖誕老人開始，因為導師問小朋友有冇問題問聖誕老人。平日小小豬都係比較怕羞，但估唔到佢依一刻識得咁主動地舉行，仲問左個好攪笑問題~

小小豬問嗰個問題就係：我呢....我呢...我其實係好鐘意食飯，咁聖誕老人鐘唔鐘意食飯呀~

同聖誕老人玩左一陣，之後就開始出去聖堂門口報佳音啦~

坦白講，今次小小豬嘅表現真係好...唔乖，頭嗰幾首歌都唔肯企定定嚟歌，到左最後嗰幾首歌先肯乖乖一齊唱。睇見佢周身郁嗰一刻我啲火都真係不停上升，嬲C我呀！

但當我返到屋企回心再想，一向小小豬嘅社交都係比其他小朋友弱，可能開頭嘅周身郁係表示佢嘅不安。不過，到最後幾首歌都可以一齊唱，咁都應該俾返少少鼓勵佢啦！

聖堂每年都有報佳音活動，雖然今年小小豬表現都係幾差，不過出年我都會再為佢報名，同時間依一年我地都會集中訓練一下小小豬，希望明年可以有好嘅表現。

係由邊度跌倒，就要係嗰度起返身，我要對小小豬有信心，我知佢一定係可以做到呀！