親子環保勞作 - 聖誕圈

9 DECEMBER 2014(TUE)

嘩哈哈...小小豬仲乜咁神氣？原來我地整左一個親子環保勞作 - 聖誕圈，大家覺得靚唔靚呢~

一向我嘅勞作都唔係特別好(其實可以話幾差...HEE HEE)，所以當收到小小豬學校要整一個有關聖誕嘅親子環保勞作時，我都幾頭痕，因為真係唔知整啲咩好。

就係依個時候，我見到有朋友仔整左一個環保聖誕花圈，所以我就決定參與吓朋友仔做法，同小小豬一齊整個環保聖誕圈啦！

其實依個聖誕圈都好似幾容易，只需要一個衣架、一啲雜誌紙同埋裝飾用嘅貼紙~

首先將個衣架拉成圓形，依個工序當然係由我負責啦~

將啲雜誌紙摺成長方形~

然後包係衣架上~

由於小小豬話啲聖誕圈係綠色嘅，所以就用綠色紙再包多一圈係衣架上，然後用膠紙貼好~

聖誕圈嘅初形就出現啦~

然後就到佈置聖誕圈步驟，上次我地去參加麥當勞叔叔馬拉松訓練時得到好多貼紙，所以就利用啲貼紙嚟佈置啦~

聖誕圈要有個聖誕老人先會有多啲聖誕感覺，所以就利用左上次去科學園時得到嘅聖誕老人紙公仔嚟做佈置啦~

最後，我就用左我一個靚靚花花頭飾嚟扎係個釣位，一嚟就好似靚啲，二嚟就可以遮住啲膠紙位。

鄧...鄧....鄧.....鄧.....我同小小豬嘅製成品可以接受嗎~

哈哈哈....其實我覺得都仍然有改善空間，不過對於小小豬嚟講佢就非常鐘意，邊拎返學校邊講佢點整個靚靚聖誕圈，之後又話要整多一個放係屋企，真係俾佢笑C呀！