13 DECEMBER 2014(SAT)
非常感謝 WeShare安排，小小豬今日參加左DC Ballet芭蕾舞堂，奉獻左第一次去做『舞仔』呀~
其實當WeShare邀請小小豬去試堂上芭蕾舞時，最開心嗰個就係大肥豬，因為佢想帶小小豬去跳芭蕾舞好耐啦！
不過無奈我地又唔知邊間好，唔係太多學校有試堂，加上又唔知小小豬鐘唔鐘意，怕交左學費之後小小豬唔鐘意，咁就好似好浪費，所以一直都只係得個想字。
可能大家都會問：小小豬係男仔嚟哦，點解咁想佢學跳芭蕾舞呀？其實一向小小豬體能上都係比較差，再加上社交方面又弱左啲啲。芭蕾舞就係好著重個根基訓練同埋紀律性都比較強，再加上一大班小朋友一齊跳舞一定對小小豬社交方面有幫助，所以大肥豬就想俾小小豬學，希望可以從中有所訓練啦！
講返今次試堂先，個地點就係將軍澳坑口嘅明德商場，老實講個商場都係比較舊式，所以一去到樓下時大肥豬都有少少擔心。
不過，一見到DC Ballet嘅時候，即刻放下心頭大石，因為裝潢好靚，同商場嘅感覺完全兩回事呀~
一入到去除左俾條靚靚芭蕾舞裙仔吸引住之外，牆上都放左好多係度學跳舞小朋友嘅外出表演相片呀~
同負責人傾左一陣之後，小小豬就準備更衣室換衫。始終都係換衫嘅地方，學跳舞都係女孩子為主，所以男仕係唔可以進入呀~
更衣室有五間小房，換衫空間都算舒服呀~
值得一讚就係負責人為左小朋友嘅安全，原先鋪位內係冇洗手間供應，佢都專登間左一個位置加設洗手間，咁小朋友有需要時就唔需要走去商場，可能安全又乾淨地使用啦~
課室個環境都唔錯哦~
好啦....夠鐘上堂，今日除左小小豬之外，我地仲同大頭妹一齊嚟上堂。不過原來男孩子嘅跳舞衫就比較普通(今日因為凍凍地，所以冇同小小豬除件白色底衫)，女仔款真係靚好多呀~
原本上堂係唔可以家長入課室，不過因為我地今日係嚟試堂，所以負責人破例俾我地入課室睇佢地上堂情況....幾分鐘啦，仲幫我影左小小豬上堂嘅相添~
小小豬上堂情況又點？當MISS講解嘅時候成日都坐唔定，但好奇怪地一聽到音樂就會跟到嚟跳， 可能小小豬一向都幾鐘意音樂，所以佢都算叫做OK，總算可以開開心心咁跟住嚟跳啦！
係我地參觀短短幾分鐘時間，我覺得MISS都好有心機教小朋友，仲用左好多小朋友鐘意嘅口語等小朋友投入啲，好似有一句"米奇..米妮..唐佬鴨同高飛，一齊踏單車入迪士尼"，依個就係教踏舞嘅步驟啦！
輕輕鬆鬆就上左四十五分鐘，當小小豬一出門口之後就主動同我講，話跳舞好好玩，仲教我"BANBAN腳"點做添。
其實依一刻大肥豬見到小小豬跳得咁開心又投入，佢地已經好想即刻同小小豬報名。不過我地下星期仲有一次試堂，等小小豬上埋先再作決定啦！(不過.....基金都好大啦...哈哈哈)
More information：
崔藹璇芭蕾舞學校
地址：將軍澳坑口嘅明德商場1樓06號鋪
Website：http://www.dcballet.com/
Facebook：https://www.facebook.com/DCBallet
沒有留言:
發佈留言