九個月啦

10 MAY 2011 (TUE)

小小豬又大多左一個月，今日就係九個月人仔啦！睇吓佢依一身嘅打扮，幾似女仔...哈哈哈~

 

係過去依一個月真係覺得小小豬大左好多，個樣醒目左就唔洗講(又讚自己個仔..哈哈)，仲識得自己係床仔扶住起身，之後扶住床欄由床頭行到床尾，再嚟又識得拜拜手(我地冇刻意教，可能係睇DVD學到啦！)，真係好似學識好多嘢，但就仲未識得爬爬，只係可以慢慢一步步咁爬，爬幾步跌低。

不過我都唔擔心，因為學習係要慢慢嚟唔可以心急嘛，總有一日係會識爬爬呀！(其實唔咁快都好，因為一識爬爬，就會通屋爬，到時好似看牛仔咁睇實，仲辛苦呀！哈哈哈~)

牙仔方面，到依家九個月都仲未有一隻睇吓，只係牙肉中隱約見到有小小白色，相信係開始爆緊出嚟。好多人都話牙仔越遲出對父母就越好，所以我都心急，慢慢出啲靚牙仔啦！

不過唔知係唔係因為出牙仔關係，小小豬依排都好忟憎，又成日扭計，仲會發脾氣添，見到咁都真係好激氣又嬲。

一見佢發脾氣或者做啲曳曳嘢，我就會打佢手仔或者PAT PAT(當然唔係好大力啦)。因為佢依家開始懂事，唔可以一發脾氣就讓佢，要開始教佢乜好唔啱，所以我唔忍心都要打一吓，等佢知道咁係錯唔可以再係咁。

雖然都真係好肉赤，不過為左教好小小豬，狠心啲都要啦！

當然小小豬都只係間唔中曳曳，好多時都係一個好乖乖，好識得逗我地開心，一見佢個招牌『月亮眼』，真係即刻暈晒浪呀！