轉奶粉

11 JANUARY 2011 (TUE)

上次睇屋企附近嘅兒科醫生時，嗰位醫生建議我地幫小小豬轉飲豆奶或者較低敏感嘅能恩，希望減少啲敏感，期望可以濕疹減少發作。

豆奶感覺上好似冇咁多營養，所以我完全唔考慮，於是就15/16諗轉唔轉能恩1號好。係BK討論區CHECK左一輪，終於決定轉雀巢能恩1號，因為好多媽媽轉左之後都話幾好，好多濕疹BB轉飲左之後情況都有所改善。

經過考慮之後，原本都係打算等小小豬六個月時一次過轉能恩2號，不過依兩日都見小小豬個情況冇乜改善，時好時壞咁，所以都唔再等，即刻開始轉能恩1號，希望快啲轉就快啲解決到個問題。

我上網都睇過其實1號仔奶粉係可以飲到BB八九個月大，咁小小豬如果轉1號OK，咁六個月時就唔轉住，等大多少少先轉2號仔，始終BB轉得太多奶粉都唔係一件好事嘛！

雖然唔知關唔關奶粉事，不過有方法都要試，唔想見到小小豬紅卜卜又忟忟憎個樣嘛。

尋日放工就買左一罐返屋企，諗住今日開始轉呀~

今日早上第一餐就轉飲能恩1號，小豬媽話小小豬都冇特別唔鐘意，同平時一樣咁，所以應該會繼續試轉，每三日轉多一餐，希望可以順順利利咁轉好晒，可以快啲同濕疹SAY GOODBYE啦！