試飲美施達

30 DECEMBER 2011(FRI)

其實依一個POST應該早一個月前出，不過一直都掛住分享小小豬嘅生活事，直到今日睇返IPHONE啲相先發現原來仲未出依個分享，真係自己都覺得自己有啲過分呀...哈哈哈！

早前參加左一個METAMUCIL美施達天然纖維素嘅試用活動，好幸運地俾我抽中左，可以得到一盒試飲呀~

 
其實我一向都好抗拒啲飲飲食食嘅產品試用，所以好多嗰啲活動我都冇JOIN。因為自己身體唔好，所以唔敢亂試啲健康食品。但依一個我就有參加，原因係因為係未生小小豬之後，我嘅腸胃都唔多好，成日都有便便問題，當時都曾經去過睇醫生，最後醫生都係介紹依個產品俾我，話對腸胃有改善咁話，所以有醫生嘅介紹，所以都好放心咁飲用。

METAMUCIL美施達天然纖維素，內含車前子成份，有水溶性及非水溶性纖維， 可平衡血脂水平及有助排便。而且個味就似橙汁，都算易入口。

每日飲兩次，一盒可以飲兩星期左右，我就選擇係早餐及LUNCH後各一杯~


 

飲完之後，唔會令人肚痾或肚痛，每日都有一次便便，不過就比平日嘅量多少少同埋味道勁少少，我估都係將身體積存了的毒素排出所致。而且飲用後有會飽肚感，唔會覺得肚餓，唔洗食零食醫肚，咁都算係可以有減肥功能啦...哈哈哈！
 
不過唯一個缺點就係比較難開，需要用和暖水慢慢攪拌，如果唔係就會起橙粒粒，同埋有好多啫喱狀物體黏係杯底度，浪費左啲纖維啦！

整體上依個產品都唔錯，都值得同大家推介呀！

三家村公園

27 DECEMBER 2011(TUE)

今晚要返小豬媽屋企食飯，大肥豬見天氣都幾好，所以就提意去三家村搭街渡過海，等小小豬可以搭船、吹吓海風、認識個海。

點知我地去到碼頭時，剛剛走左班船，要等半個鐘先有下一班，所以唯有係附近行吓。我地行行吓發現碼頭附近有個好靚嘅小公園，仲有條海濱徑，最好就係冇乜人，所以我地就係度玩一陣，等搭下一班船。

依個小小豬一有得周圍行就係最開心呀~




我地仲玩BUBBLES玩添(哈哈..見小小豬咁鐘意玩BUBBLES，所以真係隨身帶備呀)~


 

有得玩嘅小小豬真係好開心呀~







兩父子又嚟玩拋豬仔啦~


 
仲係條海濱徑度跑嚟跑去~

 

唔覺唔覺真係話咁快就半個鐘，我地要去搭船。

小小豬都算係第二次搭船，不過都仲係好新奇咁，全程都望住個海，仲望到入晒神咁~




今日去嗰個三家村公園仔雖然就細細地，不過勝在環境好舒服，又乾淨，我地嚟依度都算好方便，所以大肥豬話下次可以再嚟依度玩呀！

BOXING DAY

26 DECEMBER 2011(MON)

平安夜同聖誕節都因為天氣凍凍地關係，日日都係屋企渡過，雖然有小小豬係度都唔會悶。不過放假冇理由放假都唔去吓街嘛，所以就近近地出左APM行個圈，睇吓啲聖誕佈置，簡簡單單咁迎吓聖誕節啦！

真係俾依個小小豬激C，一出到街就好似個八卦豬咁周圍望，想同佢影張靚靚地嘅相都真係好難呀~




 
一放佢落地就周圍行，見到啲鏡又即刻行埋去自戀一番~




 

可能見到啲閃閃球好靚，要我抱佢上去玩呀~



 

玩完一輪之後，我地就去小小豬另一至愛嘅地方，就係去扭蛋機，依個傻豬仔一見啲扭蛋就真係好興奮咁，急急腳咁行嚟行去，仲成日整個得戚樣出嚟呀~
 

之後我地就去食晚餐，不過就要等一陣位~



 

之前係銅鑼灣食過甘味讚岐手打烏冬覺得幾好，所以就打算帶大肥豬去試吓。點知原來依兩間係唔同，APM依間就只係得烏冬，冇刺身壽司嗰啲。不過既然入到嚟，所以都算啦！

我地ORDER左啲兩碗烏冬同小食，我地都覺得麻麻，尤其大肥豬個豬骨烏冬只係微暖都唔熱，啲嘢食又冇銅鑼灣嗰間咁好食，所以都應該唔會再有下一次啦~
 

食完我地就去食甜品，去HAZZAN DAZ叫左個聖誕雪人食(不過都好似唔多似雪人哦..哈哈)~
 
小小豬一見到枱面個雪糕時，就不停好大聲咁叫『NANA』『NANA』，原來佢識得碟入面嘅香蕉。雖然佢一早就已經可以認得有皮包住嘅香蕉，叫識叫佢地做『NANA』，但搣左皮嘅香蕉我地都冇俾佢見過食過，所以佢竟然將切開兩邊嘅都認得到，所以當時我地都好既驚訝又開心。為左獎勵叻叻小小豬，我地都俾左少少『NANA』佢試啦。

聖誕小PARTY

25 DECEMBER 2011(SUN)

今個聖誕真係好凍，為免小小豬凍親，所以我地都留係屋企過。不過今日話晒都係聖誕節，所以糖糖同小肥肥上左嚟我地屋企同小小豬玩，一齊過一個開心聖誕夜。其實兩個妹妹仔上嚟都係主要送份聖誕禮物俾小小豬....哈哈哈！

佢地話為左培養小小豬個音樂天份，所以送左個玩具鼓俾小小豬。呵呵...其實係佢地睇得天與地多，所以想叫小小豬一齊夾BAND呀！

依個小小豬一見到個鼓都不知幾開心，教佢玩過一次之後，就好似識得玩咁，有文有路咁打鼓呀~

玩左一陣，我地就開餐啦....小小地叫啲外賣嚟個聖誕小PARTY啦~

食完之後，我地又有玩另一樣玩意，亦都係兩位妹妹仔帶上嚟送俾小小豬。就係小小豬至愛嘅BUBBLES，睇吓傻豬仔玩得幾開心~

我地當然都玩埋一份啦~

玩到最後，依個小小豬直頭好似傻左咁，見到糖糖吹BUBBLES吹爆啲泡泡時，真係笑到傻左咁。就係因為咁，糖糖不停吹爆泡泡嚟引小小豬笑，仲整到成口都係泡，真係用心良苦啦！不過見到小小豬笑得咁開心，相信佢都唔介意呀~

雖然只係簡簡單單係屋企渡過依個聖誕節，不過大家都好開心，咁都不失為一個愉快嘅聖誕！