燉雞汁

27 AUGUST 2010 (FRI)

由於開刀關係，所以由小小豬出世之後都唔可以食補品身，小豬媽話起碼要過多一個月先可以食藥補身。

雖然話唔補得，不過生完BB都要開始補吓，唔用得藥材，小豬媽就話燉雞汁俾我飲，清清地咁補吓個身先，等遲啲可以補得先食藥材嗰啲。

原本小豬媽話我出院之後開始每日燉雞汁俾我飲，不過我唔爭氣，係出院之後都唔係好舒服，啲咳未清晒之餘仲有少少感冒，所以一直都未開始燉。

終於到今日我好番晒，所以小豬媽就燉雞汁俾我飲啦~

依碗雞汁係成隻雞嘅精華所在，真係超甜勁好味。

小豬媽話今日開始日日飲，補身之餘仲等我就會精神啲。最好就係雞汁係好清甜又唔躁，就算日日飲我都唔會肥呀！