滿月啦

10 SEPTEMBER 2010 (FRI)

唔覺唔覺小小豬終於都已經一個月大，即係滿月嘅大日子啦！

對我嚟講都係一個好重要日子，因為終於可以好暢快咁洗白白同洗頭。當小豬媽嚟到屋企時，我就即刻煲碌柚葉水去左洗白白，真係從未如此舒服過呀！其實坐月途中都有洗過白白，不過都只係用薑水淋身咁沖，都係冇淋花灑咁舒服嘛。

之後小豬媽就準備用品係屋企拜神，完成所有儀式後，小豬媽就送左份大禮物俾小小豬，係一條保平安嘅金鏈呀~

滿月就即係可以出街，所以小小豬就坐車車去街街啦~

其實都唔係去邊，只係去酒樓一家人食晚飯。滿月又點少得紅雞蛋呢？有小豬媽自家制紅雞蛋~

滿月大個仔啦，又點可以唔同小小豬影相呢~

食飽飽返到屋企之後，我同大肥豬都俾左封利是小小豬，等佢可以健健康康、快高長大、最重要就係聽聽話話~