由籌備婚禮開始到現在，網誌都有十年了。一位全職傻媽及親子博客，喜愛利用網誌記錄我家嘅親子育兒及烹飪食譜。 讓Kinsey擁有一個快樂童年是我的目標，繼續分享我們這一家的生活傻事，見証Kinsey的成長。
29 JULY 2010 (THU)
哈哈...真開心...因為由今日開始我放假啦！
不過，我仲未正式放產假，嚟緊依七日(連埋星期六日)係放我本年度嘅大假，之後番多一日工，跟住就開始放我嘅產假。
雖然學校唔可以將大假連產假一齊放，要係中間返一日工，但講真我嘅工作都已經交低晒俾同事，所以嗰日返工都係HEA吓咁(相信嗰日我嘅工作都係上網..上網再上網...哈哈)，所以都算可以接受。
好在LULU妹都係放假中，所以由今日開始佢就嚟左我屋企住，諗住有人可以陪我之餘，有乜事起上嚟都多個人照顧我嘛，所以依幾日我都應該唔會悶嘛！
由今日開始，我嘅工作就係訓...訓...訓，休息多啲等小小豬作最後衝刺呀！
28 JULY 2010 (WED)
越接近預產期，就要一個星期去母嬰健康院做檢查啦！
今次就約左十點半先去做檢查，一上到去都見到唔係太好人，就連檢查度血壓、磅重、驗小便都唔洗排隊，心諗一定唔洗等太耐，好快可以走得啦。
不過....原來唔係好似我所諗，等吓等吓都等左成個幾鐘先見助產姑娘，可能上星期先見過姑娘，所以都冇乜特別嘢同我講，只係問我有冇啲乜異樣，成個過程都唔洗三分鐘。
之後又等左差唔多成個鐘就去可以見醫生，今次見番上次嗰位溫柔醫生幫我按肚，所以都安心啲。醫生幫我按肚同聽心跳，都話小小豬好正常，頭仔已經落左盤骨位，不過就未去到最低位置，咁我都放心啲，即應該未生得住啦！
下星期三又去再政府做檢查，不過應該都係最後一次啦！
26 JULY 2010 (MON)
擔驚受怕嘅兩星期又過左，又係時候去私家做產檢，可以見吓小小豬啦！(不過唔知點解依兩個星期過的好似好慢咁)
入醫務所第一時間當然又係要磅重，依兩個星期我總共重左三磅，俾預算中重多左一磅，但姑娘話都唔算誇張可以接受。
等左一陣就見醫生，醫生先關心吓我依兩個星期嘅情況，再睇埋我對腫豬腳，之後就同我量血壓。今次上壓係120，不過醫生話我依個周數都算正常唔太高，叫我唔洗擔心。
同醫生傾完之後，就去照超聲波睇吓小小豬個生長情況。醫生話由於子宮開始迫住小小豬，所以大得唔會好似之前咁利害，但係超聲波睇整體上生長情況都係好好，各樣情況都好滿意。頭仔就繼續向下移，不過照情況係未生得，應該係可以依照原定日子出世啦。
聽到醫生咁講，真係成個人都輕鬆咁，唔洗再驚會突然間作動啦！(不過我都會好小心咁照顧住個肚仔，等小小豬可以繼續安安全全咁吸收多啲營養，做個大隻B嘛。)
下星期就係最後一次產檢，希望一切順順利利啦！
26 JULY 2010 (MON)
今日係七月二十六日，距離我生日仲有一個月，不過今日就已經收到本年度第一、二份生日禮物，兩份禮物都好鐘意，仲既驚喜又開心，因為冇諗過咁早就有禮物收嘛~
因為我返埋依個星期就開始放我大假連產假嘅假期，咁係我生日月就見唔到送禮物俾我同事，所以佢地就好有心咁提早送份禮物俾我，預早同我慶祝生日啦！
本年度第一份就係一支得意MARIE筆筆~
第二份就係一個好可愛嘅MARIE暖水袋，送禮者話好啱我生完小小豬之後用，又或者可以留俾小小豬當咕臣用呀~
哈哈...咁早就可以收到生日禮物，真係超級開心，仲感受到佢地對我嘅心意，因為真係冇諗過佢地會記得我生日，仲俾個驚喜我添！
24 JULY 2010 (SAT)
我一直都希望以母乳喂哺，不過唔知到時自己個身體狀況可唔可以做到，當然我係會迫自己盡量去做，始終母乳有益啲又對我同小小豬都有幫助啲嘛。
不過我都要為小小豬諗定一種奶粉做後備，就算我真係唔可以喂母乳，都可以即刻有奶粉俾佢唔會餓親。加上我放完產假之後都應該唔可以喂母乳，所以都要為之後日子諗定邊種奶粉。
雖然我都收到幾間奶粉公司送嚟嘅奶粉試飲，不過我一直都想小小豬係飲日本奶粉，感覺上安全啲又健康啲，起碼唔洗敢會有問題出現。
不過日本奶粉實在太多選擇，朋友推介都有好多隻，所以都幾傷腦筋，好驚會揀錯會影響小小豬生長，所以近排我好乖乖咁不停上網搵資料，又去睇吓BK媽媽嘅介紹，終於都係決定左買和光堂，今日放工仲同大肥豬去買左一罐做後備添~
比起其他牌子，和光堂算係平嗰種，我依罐都只係$135，所以買嘅時候都怕會揀錯。不過依個牌子都係日本奶粉入面最歷史悠久，又未出過事，所以我先揀佢，希望我真係冇選擇錯啦！
22 JULY 2010 (THU)
打唔成風都知道一定會落雨，不過真係冇諗過會落得咁利害，今日由下午開始都真係冇停過，仲要係落得好大嗰種，攪到都有少少擔心唔知放工點走好。
終於等到放工，我地見個雨勢好似細左啲啲，咁當然就即刻走人。
點知同糖糖行到一半，雨勢又開始大起上嚟，我地係半路等左一陣，諗住等細雨啲先再繼續行，但見個雨勢好似唔會細咁，所以最後我都係決定為安全起見，搭的士返屋企。
糖糖幫我截左部的士之後，我先車佢落地鐵站，之後我再返藍田。
嘩....成程車都唔洗二十分鐘，就要成百二蚊，好貴呀~
我返工咁耐都係第一次直接搭的士返屋企，不過落雨濕濕為安全起見，加上依家係非常時期，所以貴少少都要啦！
21 JULY 2010 (WED)
兩個星期又過，又係時候去母嬰健康院做檢查啦！
今次都係約左九點鐘之做檢查，不過同上次唔同係，我一上到去就見到勁多人，就連檢查度血壓、磅重、驗小便都要等左十五分鐘先到我。
等左差唔多一個鐘左右，終於都聽到叫我個名，就入姑娘房去俾姑娘按肚。點知當我慢慢咁爬到上張床仔時，姑娘竟然同我講今次應該係由醫生按肚，叫我落番張床出去再等叫名。
依個時候都真係有啲嬲，幫我排錯隊等我白等成個鐘我都算啦，不過個姑娘真係好唔得，成個過程都係坐係佢個姑娘位，張檢查床咁高都唔扶吓我上落。唉...可能依啲就係政府特色啦！
又繼續等左差唔多半個鐘，就去見助產姑娘，姑娘話第一件事就話我已經算叫做足月，可以隨時生得，叫我有乜事就即刻去醫院，仲教我穿羊水時嘅徵狀，叫我小心啲，聽完佢講真係有啲驚驚地呀。
之後又等左差唔多半個鐘就去見醫生，依位醫生真係好好人，我上落檢查床都扶實我，仲不停叫我小心啲，又係按肚時叫我唔好介意佢對手凍，同之前個姑娘真係差好遠呀！醫生幫我按肚同聽心跳，都話小小豬好正常，頭仔向下發展緊，不過又未去到最低位置。咁我都放心啲，即應該未生得住啦！
嚟緊去就要一個星期去一次政府做檢查啦！
19 JULY 2010 (MON)
繼上次糖糖成功利用集運淘寶之後，我地又點會咁快收手，所以就又開始左我地嘅淘寶第二擊啦！
原本我都好想繼續淘吓嘢俾小小豬，但大家都叫我等小小豬出世先再繼續買，所以我就改變策略，今次淘左啲用品俾自己，不過我所買嘅嘢都係為小小豬已設呀。
首先就係買左兩套哺乳型睡衣，留返入院同係屋企坐月時著，依兩套嘅質地都唔差，仲幾抵添。
紅色短袖依套只係人仔$48~
黑色長袖依套就人仔$58~
另外我仲買左兩個袋仔， 一個係紅色嘅背包，諗住遲啲同小小豬出街時用背包好似方便啲。依個係我買咁多樣嘢最抵，因為只係人仔$39，個款好就唔在講，個質地仲唔係差，仿皮質地嚟呀~
依個袋都只係人仔$52，都係仿皮質地，係打算用嚟第日做媽媽袋呀~
哈哈...經過今次淘寶之後，應該就會停一停先，因為暫時都仲未諗到有啲乜想買。或者等小小豬出世後就再淘啲衫仔俾佢，到時又要麻煩糖糖啦！哈哈~
15 JULY 2010 (THU)
時間都差不多，係時候要開始煲薑醋啦！
依個重要任務我當然係全權交晒俾小豬媽負責(因為我唔識嘛..哈哈)，小豬媽係上兩個星期開始已經密密手刨薑，一個人刨左成十五斤薑，真係辛苦晒呀。
原本小豬媽都打算嚟我屋企煲，不過為怕我地唔識會倒亂檔之餘又唔想成日嚟我地屋企睇火，所以最後都係決定係小豬媽屋企煲，等煲好大半先再拎嚟我地屋企。
經過小豬媽嘅努力，終於都整好煲好左第一批薑醋，今日仲叫左小豬爸車嚟我屋企做後加工作呀！
第一批拎嚟嘅十五斤薑醋~
有薑當然要加醋啦~
落煲啦，仲未計豬腳同雞蛋，都已經好大煲啦~
嚟緊就係我嘅工作，每四日就滾一滾，等啲薑入味啲，煲到小小豬出世咁就得啦！
哈哈...依一煲係第一批，主要係俾我食同埋招呼探我地嘅朋友。係小豬媽屋企又已經開始煲緊第二批，又嚟十五斤薑，真係辛苦晒小豬媽，所以我一定會教小小豬要好好咁錫小豬媽補數先得呀！
除左薑醋之外，小豬媽仲整左啲薑皮俾我，等我坐月時用嚟洗頭沖涼呀~
12 JULY 2010 (MON)
三星期又好快咁過左，又係時候去私家做產檢，可以見吓小小豬啦！
入醫務所第一時間當然就係磅重，一上到個磅真係難以至信，因為係依三個星期我足足重左七磅，比起醫生定落嘅簡直係一個DOUBLE。嗰一刻我都真係唔知開心好定驚好，因為依幾個星期我都冇乜胃口，係我食少左嘢嘅情況吓都重咁多，好驚係有問題呀！
一見到醫生，醫生第一件事就話我重太多個情況唔太正常，話重太多係會唔健康，仲叫我飲食要小心啲(不過其實我一直都好檢點，都戒得好清啦)。之後量血壓就仲驚，我平時嘅血壓都係好正確嘛，點知今次量到我上血壓有成125，都未試過咁高，所以聽到你都唔好話唔驚。最後醫生都留意到我都有腳腫情況出現，叫我按摩吓同多啲俾對腳休息，唔好行太多路。
同醫生傾完之後，就去照超聲波睇吓小小豬個生長情況，當然小小豬個生長情況都係好好，整體上大個左好多，同平時一樣佢嘅頭仔、肚仔同埋腳仔時都比預產期周數大，尤其係個頭仔，比預產期大成兩周，個位置仲開始向下移添。
醫生總括我個情況，佢話小小豬有機會比預產期早出世，仲寫定入醫紙俾我，叫我有乜事就即刻去醫院，仲提我要執定老佬袋呀。
嗰一刻個心情真係矛盾，如果小小豬自己選擇早出嚟，咁即係佢係健康，可以早啲見到小小豬當然係一件好開心嘅事，不過如果突然間作動，好驚會處理唔到，會好『論盡』嘛！
兩星期後就會去做最後一次產檢，到時再睇吓小小豬個情況，希望小小豬可以順順利利、健健康康咁繼續生長，係我地預定個日期出世啦！
雖然我都有啲擔心，不過我都會學會放鬆，唔好太緊要，因為咁都會影響都小小豬嘛！
12 JULY 2010 (MON)
今日又幫小小豬收到一份禮物，係一份衫仔禮盒裝嚟呀~
事緣今朝返工就係桌面見到份禮物，原來係學校嘅家長教師會主席送，當時個心情都真係好複雜，因為有禮物收當然係好開心嘅一件事，不過係我印象中係唔可以接受家長嘅禮物，加上之前懷孕嘅老師都冇收過主席所送嘅禮物，都有啲受寵若驚感覺，所以嗰一刻都真係唔知點算好。
終於我都決定左將禮物事件同副校長講，等佢幫我做決定。最後副校長同校長傾過之後，叫我多謝家長教師會主席，同埋可以收左份禮物。
我都知道依個都係家教會主席嘅少少心意，不過如果唔攪清楚啲程序，好似唔係幾好咁。雖然好似攪到好大件事咁，不過依家我就可以收得安心啦！
7 JULY 2010 (WED)
今次幫小小豬收左好多禮物，簡直係可以話大豐收呀！
首先就係學校收到一位老師嘅禮物仔，係一張好得意嘅西瓜被仔嚟呀~
夜晚就返左小豬媽屋企食飯，個驚喜真係可以話一浪接一浪，幫小小豬收左好多禮物呀~
有LULU妹送嘅TEE(因為LULU妹話鐘意個公仔，所以就買定俾小小豬，等佢大個時先著。不過真係好大件，相信要等一段時間先可以著到啦...哈哈！)另外，小豬媽同LULU妹每人都買左一對初生BB襪仔俾小小豬。
不過最估唔到嘅係小豬爸突然預早俾左封大..大...大...大...利是俾小小豬，叫我留番用嚟買嘢俾小小豬。
哈哈...小小豬未出世都已經咁多人錫啦！
7 JULY 2010 (WED)
兩個星期又過，又要去母嬰健康院做檢查啦！
今次我約左九點鐘，可能都係第一批檢查，所以都唔算太多人，等左一陣就去檢查度血壓、磅重、驗小便。
當我度完血壓次後，等左一陣就到我去俾姑娘按肚仔，今次依個姑娘真係好NICE，邊按我個肚仔就同我講我個狀況。姑娘話我個胎位同肚仔大細都好好，同我預產周數都好夾。當姑娘按小小豬個頭仔時，仲教我摸頭仔，之後仲讚個頭仔圓卜卜咁好好添。聽到之後真係勁開心呀！
按完肚仔就到聽心跳，上次姑娘都係主要俾佢自己聽，不過今次依位姑娘驚我聽唔到啲心跳聲，今次直接將部心跳機放係我耳邊，等我聽清楚啲跳聲。小小豬心跳都係一百四十幾吓，姑娘話個數字都係好好。
見完按肚仔姑娘，等左半一陣就可以見助產姑娘，其實都係冇乜特別，都係問番我依幾個星期有乜問題，傾左五分鐘唔夠就走得。
係臨走時姑娘提我要執定走佬袋，以備不時之需，所以我都係時間要做嘢啦！
4 JULY 2010 (SUN)
今日天朗氣清，最適宜就係去沙灘玩吓沙玩吓水，所以大肥豬帶左我去近近地嘅清水灣沙灘行吓啦！
可能天氣太好關係，真係勁多人，我地都好難先搵到個可以容納到我地嘅位呀！
雖然有酷熱天氣警告，不過係沙灘入面又唔覺得好熱同晒，間中有啲涼風吹埋嚟，仲覺得好舒服添。
今日個天空真係好靚又藍又清，所以大肥豬幫我影左好多相呀~
當然除左依個裙仔LOOK之外，去得沙灘我又影左啲露肚仔相。比起上次係淺水灣，今次仲覺得尷尬，因為沙灘入面實在太多人，怕俾人笑我依個大肚婆唔知醜，所以都有一刻放棄唔想影。
不過大肥豬就極力鼓勵我，係我考慮左差唔多十五分鐘後，最後我決定唔理咁多，為左俾自己留個紀錄，終於鼓起最大嘅勇氣，影左露肚仔嘅大肚相。
今次嘅大肚相我都好鐘意，不過就衰在太多人唔方便SET腳架，冇得影合照。哈哈..等我又唔知醜咁同大家分享兩張我至愛相啦(記得要讚我靚呀)~
今日同陽光玩完遊戲之後，就冇得再去玩，要趁星期六日乖乖咁留係屋企閉關，修心養性休息同埋整理埋小小豬嘅嘢，準備迎接小小豬來臨啦！
