神秘禮物

今日放工打俾大肥豬，佢就古古怪怪咁話有份神秘禮物俾我，話係用嚟影靚相用。

心諗係乜呢？唔通係靚鏡頭？不過又冇可能，因為佢都話過有支定焦靚鏡之後，短時間內都唔再買鏡，所以係返奶奶屋企途中，不停係度諗究竟係乜啦！

於時一見大肥豬，就迫係拎份神秘禮物出嚟！原來就係.......

依本書係專講我地部SONY單反嘅應用技巧，大肥豬話等佢學識晒書入面嘅技巧，仲話之後去影相都要帶埋本天書，咁就真係可以影到靚相啦！嘻嘻.....真係唔知好嬲定好笑！

不過都好，起碼大肥豬會俾心機去學影相，咁我之後嘅相應該會靚啲啦，有得益嘅都算係我呀....哈哈！

自家制芒果糯米糍(已加入食譜)

糯米糍我自己都整過好多次，真係冇一次係成功，所以都攪到冇晒信心，唔敢再整。

不過前幾陣子見到糖糖又整糯米糍，見佢整得又靚又好味，所以又再心思思再想自己就去整。於是買整材料，就開工整啦！

依照糖糖個食譜，係廚房閉關左一陣時候，終於整好左自家制芒果糯米糍啦~

開頭我以為切大粒啲芒果，會易包啲。但原來包起上嚟真係唔容易，所以有啲個樣好醜樣，有啲又大又少咁。當然有啲都包得幾靚~

哈哈....雖然個賣相她似差左少少，但終於都算成功左，大肥豬仲讚話最好食係依一次呀！我自己都覺得唔錯，都幾好味呀！

今次仲整左一啲聽日拎俾小豬爸食，如果佢地都覺得好食，就真係真正嘅成功，咁我又會再有番心機去整其他唔同款嘅糯米糍啦！

芒果糯米糍

材料：

芒果汁       250 ml – 我用維他芒果汁
糯米粉       1盒 – 用番維他個紙盒，一盒滿
糖              3茶匙 – 睇下大家鐘意嘅甜度加減
芒果           1個
椰絲           適量

做法：

1)將芒果汁、糖攪拌

2)將糯米粉加入至芒果汁內，攪至冇粒粒 (要小小咁落，唔好一次過，會好難攪呀！)

3)放入薄碟蒸大約15分鐘

4)待約二十分鐘稍涼後(微暖時最不痴手)，戴上手套(手套一定要擦一層薄牛油，以防痴手)，隔住取 一撮芒果糯米粉團，於手心壓平，加入芒果粒搓圓

5)再將糯米糍舖上椰絲即成

腳底按摩

大肥豬早排睇見到萬寧有得換OTO腳底按摩機，為免我地一個個咁買嘢換印花，所以上星期我就係YAHOO拍賣場BID左30個印花，打算換個按摩機啦~

當收到啲印花時，大肥豬又話15/16唔知買唔買好。所以我就叫佢KEEP住啲印花，等佢自己決定買唔買啦！

今日放工返到屋企，就見到部腳底按摩機，真係換左啦......哈哈~~

哈哈...大肥豬仲唔等我，自己玩先啦~

當然我都有份玩，仲覺得幾過癮，做完之後仲好舒服，對腳好似輕鬆晒啦。

哈哈...依家有部按摩機係屋企，咁去完行街街就可以返屋企做機舒服番啦！

又嚟我的美麗日記

之前買買埋埋都好幾盒我的美麗日記面膜，日日FULL都應該可以用個幾月...哈哈~~

原本都打算禁止自己再買，等用咁啲先再入貨，點知今日去萬寧買嘢時，見新出左一款草莓優格面膜，仲做緊特價$58添，所以又買左返屋企。

不過對我嚟講係免費，因為趁大肥豬俾錢時放埋係收錢處，所以就.......多謝大肥豬啦~

剛剛試用完，個感覺係.....冇朱古力咁香，但用完又FEEL到塊面唔乾，好乾淨咁，唔通依啲就係『零油光』嘅效果(佢係咁寫呀..哈哈)。

講起我的美麗日記面膜，記得之前有位BLOG友仔留言話我知，香港嚟講只係得萬寧同7-11獨家發售，直接係台灣既廠出品。其他地方買嘅都係水貨，好似係深圳制做。

雖然唔知係唔係真，不過為安全計(對內地產品都冇乜信心)，都係去返萬寧買正貨，好似有信心啲。同埋萬寧間唔中都會做特價$58，比起其他嘅都係貴幾蚊！

對我嚟講都係安全至上好啲~

D女玩轉帝苑

尋日去帝苑嘆TEA BUFFET，咁好嘅地方，又點少得我嘅DOLLCENA呢，所以今次就帶埋POOH女一齊去玩啦！

哈哈…今次幫POOH女影左唔係好多相，不過都幾靚呀~

是日至愛~~冥想中的POOH女 

除左我之外，CARCAR同小M都帶左D女同JUN兔一齊去影相~

依家好似同公仔影相變成我地聚會活動之一，咁都好呀，一齊幫公仔影相都係好開心呀！

不過因為環境所限，所以我地都唔係影得好多公仔CROSSOVER相，下次我地一定要再一齊影過呀！

帝苑TEA BUFFET

繼上次迪迪尼HIGH TEA之後，我地今日又嚟食過，去帝苑酒店嘆TEA BUFFET啦！

TEA BUFFET我就好少食，不過聽BB YEE同CARCAR介紹都話好正，所以我都幾期待。

一入BUFFET餐廳，就已經俾佢地嘅CAKE吸引住，所以坐底一陣嘢都未食，就即刻出去影..影...影啦~

我地先食熱食，再食CAKE，真係冇介紹錯，啲嘢食真係錯。尤其係啲CAKE，好味得嚟又唔太甜，總之就係勁好味啦~

我地都邊食邊傾計，當然唔少得影影相啦~

隨住個TEA BUFFET個時間係兩個鐘，所以今次我地個約會係短短地，不過都已經係好開心。

食得開心之外，仲有禮物收添。就係CARCAR嘅泰國手信靚靚蝴蝶袋，我好鐘意呀，真係多謝晒~

哈哈~相信我地好快就會再嚟聚過，不過下次要時間長啲呀！

溫馨意粉餐

依排我都好乖乖咁成日都煮飯仔，因為我識煮又煮得好食嘅唔多，所以次次煮都諗一陣先知煮乜好。

煮左幾日中餐，都係時候整啲新花款，所以今日就整左個意粉餐。哈哈...都幾豐富呀~

個肉醬意粉我好比心機整呀，我係用新鮮豬肉同蕃茄整呀，大肥豬都話好食。不過我自己就覺得個汁就整得少左啲啲，下次一定會再更加好味呀~

除左個意粉，當然唔少得整啲雞翼啦~

一向我都好怕煎嘢，好怕啲油彈上身，都幾痛呀！不過冇理由怕左而唔去做，所以最後都決定煎雞翼。

真係冇講錯，煎雞翼真係彈油彈到飛起，仲彈到落手度，真係勁痛，依家都紅左呀！

係我邊叫救命邊煎雞翼嘅時候，大肥豬就走左入廚房，搶左我個鑊鏟.....於是就由大肥豬煎埋下半場，所以話依碟煎雞翼係我地兩個嘅合力傑作，所以特別好食呀...哈哈！

極速晚餐

今日放工如常約左小豬媽TEA一TEA先返屋企煮飯仔。不過係我地TEA完之後，見到有好多引誘，好多鞋鋪同衫鋪都做緊特價，我地當然唔執輸睇吓，就係咁睇晏左添。

同小豬媽分開後，我就急急腳咁返屋企煮飯仔啦！

好在一早就諗好晒煮乜，所以好快就買好晒餸，返到屋企又好快咁洗..洗..洗...同煮...煮...煮，最後用左四十分鐘整好左兩餸一湯嘅簡單晚餐啦~~

今日個晚餐主角就係依個腐乳炒雞，依半隻雞仲係小豬爸俾我，話等我有好野食呀~

哈哈....第二次煮依個，不過今次就重手左，落多左腐乳，所以攪到辣左啲，但都過得去。

除左仲有飯後果添，就係兩個小豬媽拜過神嘅大芒果~

荔枝角公園

尋日係復活節假期最後一日，一早起身就見勁好陽光，為左唔好浪費咁好嘅天氣，所以就決定去影相。

由於時間關係，要搵個近近地嘅地方，最後就決定去荔枝角公園影番輯靚相啦！

係出發時都好地地，行到入公園都冇乜事，係個天開始冇咁好太陽，不過都唔理，不停係度影影影~

點知當我地行到去嶺南之風嗰個位置時，開始行雷同落雨，真係激氣，攪到要入去啲亭避雨。

不過咁都係，因為係個亭入面避雨時，冇嘢做就可以有多啲時間慢慢影相嘛~

仲有時間SET埋腳架慢慢就位影合照添~

雖然個天氣唔係太好，不過我真係幾鐘意依輯相，尤其係依兩張，真係唔可以唔讚下大肥豬，影好有FEEL之餘，仲影得我幾靚呀~(哈哈..又有人自己讚自己啦！)

雖然我地都未行得晒，影得晒成個公園，不過見雨細啲啲嘅時候就走啦！唯有等下次有機會就再影過啦~

點知...當我地行到去MTR時，竟然太陽又再一次出嚟，仲幾好天添....真係激氣。再一次証明.......超級黑仔王是我！