終於行畢業禮啦

等左好幾年，終於等到今日啦！

今日可以算係大肥豬一生入面第一個重要日子，因為終於都大學畢業，行畢業禮啦！為左分享依個重要時刻，我仲請左半日假呀！雖然一放工就要好趕咁走去理工，不過都係值得呀！

不過當我去到場館時，大肥豬都已經入左去綵排，見唔到佢，嗰時個心都有少少掛掛地，唔知佢件畢業袍有冇整得唔好，個頭有冇整靚仔……總之就係心掛掛咁啦！

之後我、小豬媽會合埋大肥豬嘅爸爸、媽媽同阿哥之後，就大家等入場啦！當係等緊途中佢地三大長老同阿哥都有講有笑，我都放心D，因為之前都怕會有尷尬場面呀！點知佢地冇尷尬之餘，仲幾好傾..小豬媽又係度不停讚大肥豬，真係聽到我都幾鬼開心，証明佢係好鐘意依個女婿嘛！

等左一陣就可以入場啦！入到場第一時間就霸靚位，之後就終於見到大肥豬啦！係依個時間當然做番一個未來老婆仔嘅工作，幫佢整好件畢業袍同個頭髮，雖然佢已經係好靚仔咁企左係我面前，不過都要整整先安心嘛！(我相信今日都係大肥豬第二靚仔嘅一日，最靚仔當然留番係12月3日啦！哈哈~)

個畢業禮開始啦，我個心就開始緊張，都唔明點解會咁，尤其見其他畢業生開始排隊上台時，就越來越緊張，個心情真係好怪呀！

由大肥豬開始等上台至行完禮，小豬媽都全程用部部DV影住，好在有小豬媽係度，如果唔係都冇左依個重要鏡頭呀！

終於等到大肥豬上台一刻，見佢行上個台到行禮，真係好感動，又要忍住，攪到我連影相都好似影唔到咁，小豬媽仲不停咁叫我冷靜，真係失禮啦！

畢業典禮完左之後，我地就四周圍影，因為我地上次已經影左一次，所以我主要都係幫大肥豬同佢地影，不過我都唔執輸影左幾張呀！

.

返到屋企就即刻播左DV睇完又睇，真係超開心呀！