【滋潤健脾】合掌瓜雪耳清補涼瘦肉湯

28 OCTOBER 2020(WED)

上次煲日月魚清補涼(按此重溫)就入手左好幾包清補涼係屋企看門口，咁煲左幾次日月魚都係時候要轉一轉口味，見屋企仲有幾粒合掌瓜同粟米係度，所以就加埋雪耳，嚟一個滋潤健脾得嚟，最重要有助提高免疫力嘅靚湯啦~

清補涼湯包一包丶合掌瓜兩個、粟米一條、漳州雪耳一両及瘦肉約$40~

清補涼湯包一般都係以健脾袪濕同提高免疫力為主。材料就有生薏米、淮山、沙參、海玉竹、蓮子、茨實、南北杏、百合同埋蜜棗~

所有藥材浸洗一陣~

粟米洗淨去皮切件~

合掌瓜洗淨去心切半~

雪耳浸透，然後剪去硬蒂~

瘦肉洗淨汆水~

煲內放約3L水，待水滾後加入所有材料~

待滾起後，繼續用大火加蓋煲約15分鐘~

之後轉慢火加蓋煲多1.5小時~

最後加鹽調味，就可以飲得啦~

以下係各食材嘅功效，可以參考一下呀(網上資料)： 

清補涼湯包 - 健脾袪濕同提高免疫力。
漳州雪耳 - 有助潤肺、潤膚同養顏嘅功效。
粟米 - 健脾和胃，利水通尿，益肺寧心。 
合掌瓜 - 有助增強人體抵抗力及有利尿排鈉，有擴張血管、降壓之功能。據醫學研究報道，合掌瓜對兒童智力發展影響較大，可以提高智力。

溫馨提示：
由於個別人仕體質不同，所以大家記得煲之前了解下自己，如有疑問，請先向註冊中醫查詢！