【飲品食譜】紫蘿蔔蘋果汁

13 OCTOBER 2020(TUE)

原本諗住去有機店再買紫蘿蔔煲紅菜頭杞子紫蘿蔔湯俾小小豬飲等佢補補雙眼(按此重溫)，不過經店鋪姐姐教路，就嚟個簡單得嚟又好飮嘅紫蘿蔔蘋果汁，俾小小豬轉一下口味啦~

材料真係超簡單，兩條紫蘿蔔加埋兩個蘋果就得啦~

紫蘿蔔嘅紫色就係來自天然嘅「花青素」，而花青素就可以對增強免疫系統能力、促進視網膜細胞再生，有助視力、增強記憶力、抗氧化，可預防有關自由基引起的疾病，包括癌症及增加血管彈性，保護血管內壁，有助血液循環，對身體各器宫和系統皆有益處(網上資料)~

首先將紫蘿蔔去皮切塊~ 

蘋果都需要去皮及去芯，然後切塊~

然後就好簡單咁放入果汁機中渣成汁，依個步驟小小豬都可以自己做呢~

最好就再隔一隔渣，咁就更加好飲~

全程唔洗15分鐘就飲得啦~

小小豬話依款果汁比湯仲更加好飲，有蘋果甜味就緊係鐘意，仲叫我留返啲紫蘿蔔嚟做果汁就好了。佢肯飲就當然好樂意整多啲，我仲方便做少啲功夫添.....哈哈！ 

BTW.... 店鋪姐姐都有提過，雖然簡單方便又有益，不過唔建議飲得太密，一星期飲一次就好了！